Найстарэйшая творчая арганізацыя Беларусі |гады заснавання – 1933-1934|

14 лютага 2016

Бібліятэка СБП — яркія імёны і новыя кнігі (фота+відэа)

У другі дзень праграмы V Міжнароднага паэтычнага фестывалю «Вершы на асфальце» памяці Міхася Стральцова адбылася прэзентацыя кніжных серый ГА «Саюз беларускіх пісьменнікаў» і паэтычных зборнікаў, а таксама новага, 80-га нумара часопіса «Дзеяслоў».

Выступае Валянціна Аксак

На вечарыне, мадэраванай першым намеснікам Старшыні ГА "СБП" Алесем Пашкевічам, было прадстаўлена пяць кніг: "Дзікая сліва"  Валянціны Аксак, "Поўня"  Леаніда Галубовіча, "З'яўленне Інфанты"  Людмілы Рублеўскай, "Каштаны ў кішэнях"  Наталлі Русецкай, "9 гранаў"  Сяргея Украінкі. Леанід Дранько-Майсюк прэзентаваў сваю публікацыю ў свежым нумары "Дзеяслова", прысвечаную Міхасю Стральцову, у гонар якога названы фестываль "Вершы на асфальце" і дзень нараджэння якога ягоныя прыхільнікі адзначаюць 14 лютага.

Празаік, першы намеснік Старшыні ГА "СБП" Алесь Пашкевіч

-- Шчыра вітаем усіх на нашым фестывалі! Так сталася, што не кожны сучасны беларускі аўтар можа выдацца ў дзяржаўным выдавецтве, таму праект, зыніцыяваны ГА "Саюз беларускіх пісьменнікаў", аказаўся вельмі патрэбным і плённым. У яго ўваходзіць некалькі канцэптуальна адрозных серый: "Кнігарня пісьменніка" для сталых творцаў, "Пункт адліку" для дэбютантаў; "Каляровы ровар" яднае арыгінальныя і перакладныя выданні для дзяцей, а Бібліятэчка часопіса "Дзеяслоў" прадстаўляе розныя пакаленні нашых літаратараў. Сёння мы радыя прэзентаваць вам нашыя кніжныя навінкі, -- адзначыў у прывітальным слове Алесь Пашкевіч.

Уверсе: дзеяслоўцы Таццяна і Анатоль Івашчанкі; проста маленькі глядач; унізе, злева направа: Алесь Пашкевіч, Богдан Задура (Польшча), крайняя справа Анхела Эспіноса (Іспанія), за ёй -- паэт Ігар Канановіч

Злева направа: Леанід Галубовіч, Алег Мінкін, Валянціна Аксак

Музычны сэт ад праекта "Мірнае мора". Уверсе, злева направа: Яўген Звераў (барабаны), Ірына Снапкова (вакал, тэксты песень і музыка), Юры Несцярэнка (вакал, гітара), Віктар Зайцаў (бас) 

Наталля Русецкая

Зборнік Наталлі Русецкай (Беларусь-Польшча) выйшаў у Бібліятэчцы часопіса "Дзеяслоў" і мае назву "Каштаны ў кішэнях". У сваім паэтычным сэце пані Наталля чытала вершы пра падарожжы, якіх, як яна прызналася, па волі лёсу ў яе шмат.

Леанід Галубовіч

Уверсе: Дзмітры Дзмітрыеў (Магілёў), унізе: Ларыса Раманава (Ветка) і Анхела Эспіноса; Наталля Русецкая

Выступае Леанід Галубовіч

Паэт і літаратурны крытык Леанід Галубовіч дэкламаваў вершы з кнігі "Поўня", куды ўвайшло найлепшае выбранае. 

Пісьменніца, крытык і журналіст Людміла Рублеўская, прадстаўляючы сваю кнігу "З'яўленне Інфанты", распавяла, што выхад гэтага зборніка стаўся для яе асаблівай падзеяй, бо апошнім часам аўтарка аддае перавагу прозе (чытачам палюбіліся яе прыгодніцка-авантурныя раманы пра Пранціша Вырвіча), і на напісанне паэзіі не хапае часу.

Уверсе: Людміла Рублеўская; Алесь Пашкевіч, Богдан Задура; унізе: Павел Рааго (Беларусь), Іван Штрпка (Славакія); Уладзімір Арлоў

Валянціна Аксак

У сваёй кнізе "Дзікая сліва" паэтка Валянціна Аксак раіць чытачам узрошчваць свой сад -- як у метафізічным, так і ў наўпроставым сэнсе. У сваім выступе спадарыня Валянціна, акром агучвання вершаў, падзялілася ўспамінамі пра сустрэчы з Міхасём Стральцовым.

Сяргей Украінка

Кніга магілёўскага паэта і выкладчыка Сяргея Украінкі "9 гранаў" пабачыла свет у серыі "Кнігарня пісьменніка". Спадар Сяргей прачытаў як сур'ёзныя філасофскія тэксты (якіх, дарэчы, у зборніку найбольш), так і гумарыстычныя.

Леанід Дранько-Майсюк выступіў з успамінамі пра Міхася Стральцова, а таксама прэзентаваў публікацыю сваіх лістоў да яго, што выйшла ў свежым, 80-м нумары "Дзеяслова".

Юры Несцярэнка і гурт Nestary Band

Пісьменнік і музыкант Юры Несцярэнка, кніга прозы якога выйшла ў серыі "Кнігарня пісьменніка", прадставіў на Стральцоўскім фэсце два адметныя праекты: гурт Nestary Band выканаў песні на вершы Алёны Беланожка, Леаніда Галубовіча, Людмілы Рублеўскай, Міхася Стральцова, а калектыў "Мірнае мора" паказаў аўтарскія беларускамоўныя песні Ірыны Снапковай.

БОЛЬШ ФОТА ТУТ

Тэкст, фота і відэа: Віка Трэнас, для lit-bel.org        

Каментары

Апошнія навiны

(Паказаць усе навіны)
Віншуем Галіну Дубянецкую і Дзмітрыя Падбярэзскага!
20 жніўня 2017

Віншуем Галіну Дубянецкую і Дзмітрыя Падбярэзскага!

Чытаць далей...
Уладзімір Караткевіч: «У нас аднолькавыя толькі плаўкі»
18 жніўня 2017

Уладзімір Караткевіч: «У нас аднолькавыя толькі плаўкі»

Чытаць далей...
Тамаш Грыб — антыфашыст, антыкамуніст, скарыназнаўца і рамантык
18 жніўня 2017

Тамаш Грыб — антыфашыст, антыкамуніст, скарыназнаўца і рамантык

Чытаць далей...
Віншуем Таццяну Барысік!
18 жніўня 2017

Віншуем Таццяну Барысік!

Чытаць далей...
1190