Найстарэйшая творчая арганізацыя Беларусі |гады заснавання – 1933-1934|

15 лютага 2016

«Мы пінгвіны!», або Як дзеткі спрычыніліся да «Вершаў на асфальце» (+ФОТА)

У дзень усіх закаханых былая кватэра Петруся Броўкі прытуліла не толькі паэтаў-удзельнікаў Стральцоўскага фэсту, але і самых маленькіх аматараў беларускай паэзіі. У музейным пакойчыку быў аншлаг — на падушках, якія былі раскіданыя па падлозе, утульна разлягліся малыя, а, каб пасадзіць усіх дарослых, не хапіла крэслаў.

Аксана Спрынчан з дачкой Альжбэтай

На вечарыну можна было прыйсці не толькі для таго, каб пачэрпаць веды пра выхаванне маленькіх беларусаў, але і каб пазнаёміцца з дзецьмі паэтаў, якія ў сваёй большасці пайшлі па слядах сваіх бацькоў.

Святы Валянцін не абмінуў і дзіцячую вечарыну. Мадэратар імпрэзы Анатоль Івашчанка прапанаваў усім дзеткам напісаць пажаданне на адмыслова зробленых для гэтага валянцінках.

Серж Мінскевіч

Адкрыў вечарыну паэт Серж Мінскевіч. Разам з дзеткамі ён праспяваў пад гітару “Мы — пінгвіны!”. Акрамя беларускамоўных вершаў, ён падрыхтаваў для малых і верш па-англійску, які выклікаліся прачытаць самыя смелыя.

Раіса Баравікова

Раіса Баравікова, акрамя чытання вершаў, павесяліла дзетак і ўласнымі загадкамі.

Усевалад Сцебурака

Усевалад Сцебурака закрануў блізкую малым тэму — тэму дамашніх жывёл. Ён прачытаў жартаўлівы верш-інструкцыю пра тое, як трэба паводзіць сябе дзецям, калі тыя вырашылі ўзяць дадому бяздомнага сабаку. Сабакі былі галоўнымі героямі і ў астатніх яго вершах.

Вера Бурлак з сынам

Вера Бурлак выступіла ў дуэце разам з сынам Кастусём. Кастусь прачытаў свае міні-вершы. А на заканчэнне маці з сынам выканалі песню, аўтарства якой належыць Кастусю. Песня было пра тое, як яны лячылі цацку, у якой завялася цвіль.

Алег Мінкін

На пытанне Анатоля Івашчанкі “Хто з вас быў у Вільні?” амаль палова дзетак з залі паднялі рукі. Па гэтай прычыне яны з цікавасцю сустрэлі віленскага госця Алега Мінкіна.

Спяваюць Анатоль Івашчанка і ягоная дачушка 

Для ўжо стомленых дзетак была прадугледжана музычная паўза. Анатоль Івашчанка праспяваў разам з усімі вясёлую “Куру Шчабятуру”.

Не абышлася імпрэза і без творчай сям’і Аксаны Спрынчан. Аксана пазабаўляла дзетак уласнымі загадкамі. Таксама яна прынесла з сабой чароўны мех з цацкамі. Дзеткі па чарзе выцягвалі з меха адну цацку. Якую цацку выцягнулі, пра тое і чытала верш Аксана. Завяршыла сямейны выступ дачка паэткі Альжбэта прачытаннем уласнага верша.

Выступаюць Уладзімір Сіўчыкаў (уверсе) і Леанід Дранько-Майсюк

Леанід-Дранько Майсюк у сваім выступе быў самы лаканічны. Ён прачытаў толькі два вершы, адзін з якіх — пра Зюзю. Леанід заклікаў дзетак шанаваць і не злаваць яго.

Андрэй Хадановіч

Завяршыў вечарыну Андрэй Хадановіч. Ён пазабавіў дзетак вершамі з кнігі “Нататкі таткі”. Прачытаць іх сольна яму не ўдалося, бо малым бацькі набылі яго кнігу, таму “Нататкі для таткі” чыталі ўсе разам. З дзеткамі Андрэй Хадановіч заспяваў песню пра галоднага ваўка. А дачка паэта Алена прадэкламавала жартаўлівы татаў верш пра тое, якімі строгімі бываюць бацькі, калі ў малых няма дысцыпліны.

Больш фота на нашай старонцы ў Фэйсбуку

Тэкст і фота: Вікторыя Чаплева, для lit-bel.org

Каментары

Апошнія навiны

(Паказаць усе навіны)
Моц слова Францішка Скарыны
15 снежня 2017

Моц слова Францішка Скарыны

Чытаць далей...
Губернскі дэтэктыў у музеі Багдановіча — 22 снежня
15 снежня 2017

Губернскі дэтэктыў у музеі Багдановіча — 22 снежня

Чытаць далей...
Да 200-годдзя Таварыства філаматаў (ФОТА, ВІДЭА)
15 снежня 2017

Да 200-годдзя Таварыства філаматаў (ФОТА, ВІДЭА)

Чытаць далей...
Пабачыў свет 5-томнік Уладзіміра Арлова
14 снежня 2017

Пабачыў свет 5-томнік Уладзіміра Арлова

Чытаць далей...
1022