Прэзентацыя кнігі “Францішак Багушэвіч. Выбраныя творы”

Той люд жыве, што свае песні мае,
Бо мёртвы пець больш н
ічога не хоча,
Песню ж жывую і смерць не спужае…

Ф. Багушэвіч

19 сакавіка 2015 г. а 16-й гадзіне ў бібліятэцы імя Ф. Багушэвіча адбудзецца прэзентацыі кнігі “Францішак Багушэвіч. Выбраныя творы”, прымеркаванае да 175-годдзя з дня нараджэння беларускага паэта, празаіка, публіцыста, перакладчыка і грамадскага дзеяча Францішка Бенядзікта Багушэвіча. Адначасова адбудзецца прэзентацыя фотаальбома “Партрэты паўстаньня 1863-1865”, дзе разам з унікальнымі здымкамі нашых суайчыннікаў змагарнага ХІХ стагодздзя, ёсць тры фотаздымкі з родавага альбому Багушэвічаў-паўстанцаў.

Укладальнікі альбома - Язэп і Каміла Янушкевічы.

Будучы паэт нарадзіўся ў фальварку Свіраны ў незаможнай шляхецкай сям’і. Дзіцячыя і юнацкія гады паэта прайшлі ў Кушлянах. У 1861 годзе Францішак Багушэвіч скончыў Віленскую гімназію і быў залічаны на першы курс Пецярбургскага ўніверсітэта. Але так і не распачаў вучобы з-за ўдзелу у студэнцкіх хваляваннях. Вярнуўся на радзіму і працаваў настаўнікам у в. Доцішкі. Удзельнічаў у паўстанні 1863-1864 гадоў, у адным з баёў быў паранены. Ратуючыся ад пераследу  мусіў пераехаць на Украіну, дзе скончыў Нежынскі юрыдычны ліцэй і амаль 20 доўгіх гадоў правёў за межамі Беларусі. Толькі ў 1884 годзе Францішак Багушэвіч вярнуўся ў горад сваёй маладосці – Вільню. Працаваў у судовай палаце. Асноўнымі кліентамі яго былі сяляне і гарадская бедната. Менавіта ў віленскі перыяд разгарнулася яго літаратурная і публіцыстычная дзейнасць.

Першымі вядомымі паэтычнымі спробамі Францішка Багушэвіча лічаць знойдзенныя ў Львове вершы: “Новы 1886 год”, “Прывід надзеі”, “Хто гэта?”. У 1891 г. у Кракаве, пад псеўданімам Мацей Бурачок, выйшаў першы зборнік паэта “Дудка беларуская”. У прадмове да яго найбольш выразна выказана палітычнае і грамадскае крэда пісьменніка. Пры жыцці творцы пад псеўданімамі былі надрукаваны яшчэ вершаваны зборнік “Смык беларускі”(1894) і апавяданне “Тралялёначка”(1892).

Францішак Багушэвіч – самы яркі нацыянальны паэт XIX стагоддзя, які імкнуўся абудзіць у народа пачуцці нацыянальнага самаўсведамлення, любоў да роднай мовы і літаратуры. З вялікай цеплынёй гаварыў ён у прадмовах аб высокіх вартасцях беларускай мовы, вельмі багатай яе гісторыіі і традыцыях. Барацьба Францішка Багушэвіча за родную мову і літаратуру была барацьбой за дэмакратыю, палітычную і нацыянальную свабоду. Ён — заснавальнік крытычнага рэалізму ў беларускай літаратуры, першы буйны нацыянальны пісьменнік, выразнік дум і памкненняў народа.

Арганізатары мерапрыемства – Дзяржаўны музей гісторыі беларускай літаратуры, бібліятэка № 14 імя Ф.Багушэвіча.

Кантактны тэлефон: (017) 334-56-21.

Паводле прэс-рэлізу