Творчы вечар Уладзіміра Мароза

“Шлях да гары”: Творчы вечар Уладзіміра Мароза

26 лютага а 17-й гадзіне ў Дзяржаўным літаратурна-мемарыяльным музеі Якуба Коласа адбудзецца творчая вечарына «Шлях да гары» – прэзентацыя новай паэтычнай кнігі Уладзіміра Мароза «Крыжы на ростанях».

Уладзімір Мароз як творчая асоба чалавек шматгранны – паэт, празаік, эсэіст, сцэнарыст, кінарэжысёр. Па першай адукацыі архітэктар (БПІ, 1975), пасля скончыў літаратурны інстытут імя А.М.Горкага ў Маскве (1983). Працаваў на «Інтэграле», у інстытуце «Мінскпраект», Дзяржкіно БССР, на кінастудыі «Беларусьфільм», у часопісе «Бярозка». З 2005 года – вядучы рэдактар студыі «Летапіс» Нацыянальнай кінастудыі «Беларусьфільм».

Больш трыццаці гадоў яго творчае жыццё звязана з беларускім дакументальным кіно. Па сцэнарыях У.Мароза знята звыш 65-ці дакуметальных стужак, звернутых да гісторыі і культуры Беларусі. Яшчэ пяць фільмаў ён зняў як кінарэжысёр. Шэраг карцін адзначаны прызамі міжнародных кінафестываляў. Узнагароджаны Ганаровай граматай Савета Міністраў Рэспублікі Беларусь, нагрудным знакам Міністэрства культуры Рэспублікі Беларусь «За ўклад у развіццё культуры Беларусі», медалём Саюза беларускіх кінематаграфістаў «За выключныя заслугі ў беларускім кінематографе».

Важкі даробак яго і на літаратурнай ніве – 19 кніг паэзіі, прозы, эсэ. Паэтычныя зборнікі «Пяшчотны дотык», «Голас», «Рэй», «Хутаранская зорка», «Дабрадаць», «Шляхцянка-восень», кнігі прозы і эсэ «Беларускі храм», «Мінск старадаўні і малады» «За брамай забытых мелодый», «Мінск.Верхні горад», «Магілёў» і іншыя.

Уладзімір Вікенцьевіч – ураджэнец горада Косава Івацэвіцкага раёна Брэсцкай вобласці. Але ён і коласаўскі зямляк, другая «малая радзіма» паэта – слынная Мікалаеўшчына, адкуль родам маці Дзіна Канстанцінаўна, у дзявоцтве Міцкевіч, дзе ў спадчыну ад деда Міцкевіча Канстанціна Антонавіча засталася хата недалеч Нёмана, якая сёння з’яўляецца радзінным кутком паэта.

У доме Якуба Коласа 26 лютага будзе паказаны відэаролік аб кінематаграфічнай творчасці сцэнарыста і кінарэжысёра, прадстаўлена новая кніга паэзіі Уладзіміра Мароза «Крыжы на ростанях».

У вечарыне возьмуць удзел мастак кнігі Марына Мароз, пісьменнікі Андрэй Федарэнка, Уладзімір Ягоўдзік, Валерый Стралко, Язэп Янушкевіч, кінарэжысёры Мікалай Князеў і Яўген Сяцько, а таксама бард Аляксей Нежавец, які прэзентуе песні на вершы паэта.

 

Адрас музея: г. Мінск, вул. Акадэмічная, 5
Тэл. для даведак: 284-15-84, 284-17-02
Афіцыйны сайт: www.yakubkolas.by
Будзем рады бачыць Вас у гасцінным Доме Коласа!

Паводле прэс-рэлізу