Абвешчана журы прэміі Цёткі

Прэмія Цёткі будзе ўручацца ў дзвюх намінацыях: за найлепшы твор для дзяцей і падлеткаў і за найлепшае мастацкае афармленне кнігі (мастаку-ілюстратару кнігі). Таму аргкамітэтам было вырашана сфарміраваць два склады журы.

Найлепшых творцаў дзіцячай літаратуры назавуць:

Пятро Васючэнка – выкладчык, літаратуразнаўца, пісьменнік, аўтар кніг для дзяцей і падлеткаў “Прыгоды паноў Кубліцкага і Заблоцкага", “12 подзвігаў Геракла”.

Вольга Гапеева – пісьменніца, перакладчыца, аўтарка шэрагу паэтычных зборнікаў і кнігі для дзяцей “Сумны суп” (пераможца літаратурнага конкурсу Саюза беларускіх пісьменнікаў “Экслібрыс” імя Янкі Маўра, 2013).

Вера Жыбуль (Бурлак) – пісьменніца, перакладчыца, аўтарка кніг “За здаровы лад жыцця!”, “Дзеці і здані”.

Вольга Мазурава – рэдактар дзіцячага часопіса “Гарбузік”.

Алена Масла – пісьменніца-казачніца, аўтарка шэрагу кніг, у тым ліку “Вандроўка з божымі кароўкамі”, “Пацучок Фэлік падарожнічае”.

Вызначаць найлепшага ілюстрататара 2015 года будуць:

Васіліса Паляніна-Календа – мастачка, ілюстратарка кнігі казак братоў Грым у перакладзе на беларускую мову.

Валерый Славук – мастак-ілюстратар, прафесар, лаўрэат Дзяржаўнай прэміі Беларусі, праілюстраваў шэраг беларускіх народных казак (“Удовін сын”, “Піліпка-сынок” і інш.), кнігі “Шляхціц Завальня” Яна Баршчэўскага, “Вясна ўвосень” Уладзіміра Караткевіча і іншыя.

Павел Татарнікаў – мастак-ілюстратар, выкладчык, лаўрэат Дзяржаўнай прэміі Беларусі, праілюстраваў “Слова аб паходзе Ігаравым”, "Графа дэ Монтэ-Крыста” Аляксандра Дзюма, “Снежную каралеву” Ганса Хрысціяна Андэрсана.

У кожнай намінацыі будзе вызначацца адзін пераможца, які атрымае грашовую ўзнагароду, эквівалентную 2000$. Больш падрабязную інфармацыю можна знайсці на сайце ciotka.by.

Фонд "Вяртанне"