Абвесцілі шорт-ліст прэміі імя Ежы Гедройца

11 лютага ў Амбасадзе Рэспублікі Польшча ў Мінску адбылася прэс-канферэнцыя з нагоды абвяшчэння шорт-ліста прэміі імя Ежы Гедройца.

На  сустрэчы выступілі ганаровы старшыня журы Надзвычайны і Паўнамоцны Амбасадар Рэспублікі Польшча ў Рэспубліцы Беларусь Лешак Шарэпка, старшыня Беларускага ПЭН-Цэнтра, паэт, перакладчык Андрэй Хадановіч, старшыня Саюза беларускіх пісьменнікаў, празаік Барыс Пятровіч.

Напачатку спадар Лешак Шарэпка падкрэсліў, што прэмія мае сваёй галоўнай мэтай ацаніць мастацкую вартасць кніг і падтрымаць сучасную беларускую прозу.

Андрэй Хадановіч, Лешак Шарэпка, Барыс Пятровіч

Барыс Пятровіч падзякаваў за ідэю стварэння прэміі польскаму боку і "Сомбелбанку", распавёў пра тое, як працавала журы. Больш за 40 кніг сёлета былі пададзеныя на прэмію, і выбар для сяброў журы быў няпросты. 

Андрэй Хадановіч называе імёны шорт-лістэраў.

Цягам студзеня на сайце прэміі імя Ежы Гедройца былі апублікаваныя рэцэнзіі маладых крытыкаў на 12 кніг, што патрапілі ў лонг-ліст. 

Шорт-лістэрамі сталі 6 кніг наступных аўтараў:

Сяргей Балахонаў “Зямля пад крыламі Фенікса”

Альгерд Бахарэвіч “Гамбурскі рахунак Бахарэвіча”

Адам Глобус “Сказы”

Уладзімір Някляеў “Аўтамат з газіроўкай з сіропам і без”

Людміла Рублеўская “Авантуры Пранціша Вырвіча, шкаляра і шпега”

Юры Станкевіч “Шал”

Віншуем празаікаў, якія ўвайшлі ў кароткі спіс прэміі! 

Пераможца будзе абвешчаны 1 сакавіка, у Сусветны дзень пісьменніка.

Прэсавая служба СБП, фота АУ