Адбылася першая імпрэза Месяца шведскай літаратуры

7 лютага ў кнігарні “Ў” адбылася літаратурная вечарына “Глобус Беларусі”, першая ў шэрагу імпрэзаў Месяца шведскай літаратуры ў Мінску, падрыхтаванага пры падтрымцы Пасольства Швецыі ў Беларусі.


Вітальным словам да прысутных адкрыў вечар амбасадар Швецыі ў Беларусі Стэфан Эрыксан.

Паэткі Валянціна Аксак, Аксана Данільчык і Валярына Кустава расказалі пра выспу Готланд, дзе ім давялося пабываць у творчых камандыроўках, Уладзімір Арлоў — пра сваю сустрэчу за келіхам гішпанскага віна з нобелеўскім лаурэатам Тумасам Трастромэрам і вандроўку за Палярнае кола на шведска-фінскае памежжа ў госці да пісьменніка Мікаэля Ніемі, Лявон Баршчэўскі выступіў з перакладамі Трастромэра, Анатоль Івашчанка расказаў пра тое, як па-рознаму ставяцца шведы і беларусы да літаратурных персанажаў, Вера Бурлак прачытала ўласныя вершы-экспрэсіі пра скандынаўскія авіялініі. Мадэраваў сустрэчу Андрэй Хадановіч.

 

Вашай увазе – фотарэпартаж з імпрэзы:

Арт-дырэктар кнігарні "логвінаЎ" Павал Касцюкевіч

 

Мадэруе сустрэчу паэт Андрэй Хадановіч

 

Уладзімір Арлоў і Стэфан Эрыксан

 

Паэтка Валянціна Аксак і перакладчыца Вольга Рызмакова


Лявон Баршчэўскі чытае свае пераклады Тумаса Трастромэра


Выступае Валянціна Аксак


У рамках Месяца шведскай літаратуры беларусаў чакаюць наступныя імпрэзы:


12 лютага (нядзеля) Ранішнік для дзетак з прэзентацыяй кнігі Юі Вісландэр “Мама Му чытае” ды Юі і Тумаса Вісландэраў  “Малы і Білан”, з удзелам аўтаркі Юі Вісландэр і яе беларурскай перакладчыцы Надзеі Кандрусевіч, а таксама спевакоў Змітра Вайцюшкевіча і Галіны Казіміроўскай, якія запісалі кружэлку з Юінымі казкамі і песенькамі.  Лялечны тэатрык Веранікі Фаміной “Лямцавая батлейка” прадставіць сваю версію Мамы Му. Пачатак а 14-й.

 

18 лютага (субота) Прэзентацыя дзіцячай кнігі Ульфа Старка “Дыктатар” (папяровае выданне+электронная версія). Пры ўдзеле аўтара, а таксама літаратуразнаўцы Яніны Арлоў, і перакладчыц:  Насты Лабады і Вольгі Рызмаковай. Вядоўца – Андрэй Хадановіч. Наведаць прэзентацыю зноў запрашаюцца дзеткі і іх бацькі. Пачатак а 14-й.

 

28 лютага (аўторак) Вечар шведскага дэтэктыва. Паказ фільма паводле рамана Стыга Ларсана і абмеркаванне феномена шведскага дэтэктыва. Вядоўца – культуролаг Максім Жбанкоў. Пачатак у 18-30.

 

12 сакавіка (панядзелак) Nobel-party. Імпрэза,прысвечаная паэту-набелісту  Тумасу Транстромеру. З удзелам перакладчыка Лявона Баршчэўскага і рэжысёра  Лейфа Ульсана. Мадэратар – Андрэй Хадановіч. Пачатак а 19-й.

 

15 сакавіка (чацвер) Тэатралізаваны вечар, прысвечаны класіку сусветнай драматургіі Аўгусту Стрындбергу. З удзелам актораў мінскіх тэатраў і рэжысёра Лейфа Ульсана, ідырэктара Тэатра беларускай драматургіі Валерыя Анісенкі. Пачатак а 19-й.

Прэсавая служба СБП