Адкрыццё кнігарні «Галіяфы»: Жукі абудзіліся вясной

Месца для новай крамы беларускіх кніг абранае ўдала – зусім побач метро і праспект Незалежнасці, пры гэтым будынак знаходзіцца не ля самай дарогі, а троху ўтоплены ў невялікі скверык, дзе ў цёплае надвор’е з ганку можна таксама спяваць і чытаць вершы.

http://budzma.by/wp-content/gallery/zhuki/tarantino-by-2014-galiafy_adkritie-5056.jpg

Дырэктар «Галіяфаў» Зміцер Вішнёў кажа, што месца для кнігарні не маглі знайсці цэлы год, пакуль аднойчы яму не патэлефанаваў музыка Улад Бубен з навіной, што на вуліцы Валгаградскай здаюцца ў арэнду памяшканні электрамеханічнага завода.

«У нас тут побач цудоўны Ленін, і мы, магчыма, будзем маляваць яго на нашых буклетах, каб патлумачыць нашае распалажэнне”, — гаворыць Вішнёў. – Увогуле думаю, мы тут застанемся надоўга, бо ўклалі шмат сіл, рабілі рамонт, стваралі ўсё практычна з нуля”. Апроч памяшкання кнігарні з вокнамі на ўсю сцяну, выдавецтва мае таксама офісныя пакоі і вялікі склад.

Вядома ж, новую кнігарню будуць увесь час параўноўваць з кнігарняй выдавецтва “логвінаЎ”, якая дагэтуль заставалася галоўнай пляцоўкай для літаратараў. У чым будзе іх адрозненне?

http://budzma.by/wp-content/gallery/zhuki/tarantino-by-2014-galiafy_adkritie-5327.jpg

«Я не стаў бы параўноўваць наш праект з нейкай іншай кнігарняй, – пярэчыць гаспадар «Галіяфаў». – Мне здаецца, мы адметныя ўжо як выдавецтва, таму паралель трэба праводзіць не з канкрэтнай кнігарняй, а з культурным асяродкам».

З новаўвядзенняў пісьменнік і мастак Вішнёў называе ўвагу да выяўленчага мастацтва: над стэлажамі ў кнігарні ўжо вісяць карціны, якія будуць прадавацца. Часам экспазіцыю галерэі будуць здымаць на некалькі дзён, каб ладзіць персанальныя выставы мастакоў з прэзентацыяй каталогаў, якія плануецца выдаваць у мастацкай серыі «Галіяфаў».

http://budzma.by/wp-content/gallery/zhuki/tarantino-by-2014-galiafy_adkritie-5140.jpg

Магчыма, праз аддаленасць ад цэнтру ды адсутнасць побач кавярні публіка “Галіяфаў” будзе адрознівацца ад багемных наведнікаў кнігарні “логвінаЎ”. На адкрыцці было шмат незнаёмых і зусім маладых твараў, збольшага студэнты, якія бралі аўтографы ў Адама Глобуса і абступалі Альгерда Бахарэвіча, прызнаючыся яму ў прыхільнасці.

Сярод натоўпу мы заўважылі Кацярыну Пікірэню, дырэктарку кнігарні “логвінаЎ”, і распыталі яе, што яна думае пра поспех канкурэнтаў:

«Дужа ўражаная, па шчырасці. Па-першае колькасцю людзей, па-другое, мне вельмі спадабалася месца. Я баялася, што тэндэнцыя будзе працягвацца: мы троху ў дварах знаходзімся, з’ явілася таксама культурніцкая прастора “ЦЭХ”, да якой не ўсе могуць дайсці з першага разу, і вось кнігарня “Галіяфы” адчыняецца ў такім зручным месцы, зусім побач з праспектам”, – кажа Кацярына.  Яна дадае, што новая кнігарня – безумоўна, канкурэнт, бо кнігі яны з Логвінавым будуць прадаваць прыкладна аднолькавыя. У той жа час адной такой кнігарні на ўвесь горад было яўна мала. “Мы абмяняліся кнігамі і будзем супрацоўнічаць. Нашая кнігарня і раней прадавала выданні “Галіяфаў”, а цяпер і яны будуць прадаваць кнігі выдавецтва “логвінаЎ”, – міралюбіва кажа Кацярына Пікірэня.

http://budzma.by/wp-content/gallery/zhuki/tarantino-by-2014-galiafy_adkritie-5082.jpg

Пакуль асартымент крамы, куды першыя наведнікі змаглі трапіць невялікімі купкамі, адстаяўшы чаргу, не вельмі багаты і складаецца ў асноўным з “галіяфаўскіх” выданняў.  Але ў хуткім часе паліцы плануюць папоўніць, у тым ліку і дзіцячай літаратурай, а таксама кнігамі выдавецтва «Русский Гулливер», з якім “Галіяфы” сябруюць. Нацэнка будзе, бо выдавецтва мусіць плаціць арэнду, але кошты на свае выданні абяцаюць самыя нізкія ў горадзе. Для прыкладу, новая кніга Юрыя Станкевіча “Брамнік заўжды самотны” каштуе тут 60 тысяч.

http://budzma.by/wp-content/gallery/zhuki/tarantino-by-2014-galiafy_adkritie-5183.jpg

Падчас адкрыцця, якое атрымалася ціхім, бо яго паглынуў натоўп, на ганку выступіў Адам Глобус, які паабяцаў быць частым госцем кнігарні, а Альгерд Бахарэвіч распавёў, што ў хуткім часе «Галіяфы» перавыдадуць ягоны раман «Шабаны». Група  Экзарцыстычны Gesamtkunstwerk паказала невялікі перформанс, падчас якога Ілля Сін сядзеў у кнігарні, апрануўшы вялізную галаву-шар, склеены з газет. На «галаву» праецыраваліся выступ тэлевядучага Аверкава і кадры, дзе жук каціць перад сабой шарык. Пасля Сін вываліўся з кнігарні, уваход у якую быў забарыкадаваны сцяной са старых кніг, а іншы ўдзельнік перформанса ў цельніку падхапіў яго на рукі і выкінуў у вялікую сметніцу. Там ён і застаўся ляжаць, на радасць дзецям, якія тут жа пачалі таксама забірацца ў сметніцу і стукаць кулачкамі ў папяровую галаву.  Магчыма, перформанс можна разумець, як канстатацыю засмечвання галоваў дробнай і мітуслівай штодзённай інфармацыяй замест чытання літаратуры. Зрэшты ён меў і практычнае значэнне, бо бібліяфілы тут жа накінуліся на разбураную сцену, выкопваючы з-пад завалаў патрапаныя кнігі з 60-х гадоў.

Кнігарня «Галіяфы» надалей плануе ладзіць у сваіх новых сценах прэзентацыі і чытанні, каб ствараць вакол сябе пэўны асяродак і сваё літаратурнае жыццё.

Аляксандра Дорская
Фота: Аляксандр Ждановіч

budzma.by