Алесь Бяляцкі вылучаны на Нобэлеўскую прэмію міру

Віцэ-прэзыдэнт Міжнароднай фэдэрацыі правоў чалавека Алесь Бяляцкі вылучаны на Нобэлеўскую прэмію міру за заслугі ў справе абароны правоў чалавека.

Кандыдатура Бяляцкага ўваходзіць у шорт-ліст - сьпіс найбольш верагодных прэтэндэнтаў на прэмію, паведаміў БелаПАН Валянцін Стэфановіч, калега Бяляцкага пра праваабарончаму цэнтру "Вясна".

2 кастрычніка на V Міжнародным фэстывалі праваабарончых фільмаў у Бішкеку Алеся Бяляцкага ўзнагародзілі дыплёмам "За мужнасьць і барацьбу за свабоду".

Прэмію за Бяляцкага атрымала беларуская праваабаронца Паліна Сьцепаненка - аўтар дакумэнтальнай кінастужкі "Сьвечка праўды Алеся Бяляцкага", паказанай на фэстывалі.

Алесь Бяляцкі, кіраўнік зачыненага беларускімі ўладамі праваабарончага цэнтру "Вясна", знаходзіцца пад арыштам ад 4 жніўня. Яго вінавацяць ва ўтойваньні прыбыткаў у асабліва буйным памеры. Падставай для крымінальнага перасьледу праваабаронцы стала інфармацыя пра ягоныя рахункі у замежных банках. Такую інфармацыю беларускім уладам перадалі Мін'юст Літвы і Генпракуратура Польшчы. Улады гэтых краінаў публічна папрасілі прабачэньня ў Бяляцкага і яго родных, а таксама прыпынілі кантакты зь Беларусьсю ў рамках дамоваў пра прававую дапамогу.

Вызваленьня Бяляцкага патрабуюць міжнародныя праваабарончыя структуры, кіраўніцтва Эўразьвязу, ЗША і шэрагу іншых дэмакратычных краін.

Ляўрэата  Нобэлеўскай прэміі міру абвесьцяць 7 кастрычніка.