Алесю Разанаву — 65!

5 снежня Алесю Сцяпанавічу Разанаву спаўняецца 65 гадоў. Сардэчна віншуем Вас, шаноўны спадар Алесь! Няхай здзяйсняюцца найлепшыя творчыя задумы! Няхай побач з Вамі заўжды будуць блізкія людзі, і каб ніколі не спыняліся крыніцы натхнення, дабрабыту, выдатнага настрою!

Алесь Разанаў вядомы як майстар эстэтычных пошукаў, наватар і эксперыментатар, вынаходнік адметных паэтычных формаў. 

З вершамі ў друку выступіў у 1961 годзе, з таго часу выдаў шэраг кніг паэзіі і перакладаў. У 1970 г. пабачыў свет першы зборнік Алеся Разанава пад назвай «Адраджэнне». Крытык Ганна Кісліцына адзначае: нягледзячы на тое, што ў выданне не ўвайшлі некаторыя ўжо вядомыя па ранейшых публікацыях вершы, кніга атрымала шырокі грамадскі рэзананс, выклікаўшы шматлікія водгукі крытыкаў, якія адзначалі не толькі змястоўную глыбіню паэзіі маладога аўтара, але і майстэрскае валоданне вершаванай тэхнікай.

Пазней пабачылі свет зборнікі паэзіі «Назаўжды» (1974), «Каардынаты быцця» (1976), «Шлях-360» (1981), «Вастрыё стралы» (1988), «У горадзе валадарыць Рагвалод» (1992), «Паляванне ў райскай далiне» (1995), «Рэчаiснасць» (1998) і многія іншыя. З апошняга — «З апокрыфа ў канон: гутаркі, выступленні, нататкі» (2010), «І потым нанава пачаць: квантэмы, злёсы, вершы» (2011). 

Творы Алеся Разанава перакладзены больш чым на 20 моў, асобнымi выданнямi выйшлi кнiгi ў Грузii, Германii, Балгарыi, Польшчы.

Лаўрэат Дзяржаўнай прэмii Беларусi iмя Янкi Купалы.

 

Алесь Разанаў

На гэтай зямлі

Хто пытаецца ў мяне дарогу на ўсход, 
хто — дарогу на захад...

Нiбы раздарожжа, я паказваю ўсiм, куды 
iсцi, а сам застаюся на месцы — 
на гэтай зямлi, пад гэтым небам,

занадта лёгкi для глыбiнi,
занадта цяжкi для вышынi,
занадта цэласны, каб падавацца 
ў якi-небудзь бок...

Вось мая левая рука, вось — правая...
Я кладу зерне ў дол — i яно вырастае 
ў дрэва:

на адной галiне ў яго сонца,
на другой — месяц,
рознагалосыя птушкi з усiх канцоў свету
спяваюць на iм свае песнi i ладзяць 
гнёзды...

Тут мой захад, i тут – усход.

Прэсавая служба СБП