«Бязмежжа» сабрала сяброў

Сёлета ў семінары ўзялі ўдзел сябры “Саюза беларускіх пісьменнікаў” на чале са Старшынём Барысам Пятровічам: Уладзімір Арлоў, Валянціна Аксак, Алесь Пашкевіч, Усевалад Сцебурака.

Валянціна Аксак і Уладзімір Арлоў. Фота: прэс-служба ГА "СБП"

Калегі з абодвух бакоў польска-беларускае мяжы абмеркавалі сучасны стан літаратуры, а таксама прэзентавалі свае новыя творы.

Сярод іншага былі ўзнятыя тэмы беларуска-польскага супрацоўніцтва і кнігавыдавецкай справы. Павал Гжэсь выступіў з бягучай справаздачай ад фонду “Віла Сакратэс”, дэманстравалася дакументальнае кіно Міколы Ваўранюка.

Барыс Пятровіч і Яўген Вапа

Вялікую цікавасць і жывое абмеркаванне выклікалі тэмы атрымання Святланай Алексіевіч Нобелеўскай прэміі, а таксама гісторыя пакалення “Тутэйшых” у дакладах Алеся Аркуша і Алы Петрушкевіч.

Злева направа: Валянціна Аксак, Міра Лукша, Ала Петрушкевіч. Фота: прэс-служба ГА "СБП"

Алесь Пашкевіч. Фота: прэс-служба ГА "СБП"  

На сустрэчы прагучалі выступы Уладзіміра Арлова, Анджэя Сцепанюка, Алеся Пашкевіча, Міхася Андрасюка, Усевалада Сцебуракі, творы Валянціны Аксак з новай кнігі “Дзікая сліва”, што выйшла сёлета ў Бібліятэчцы часопіса “Дзеяслоў”, і іншых творцаў, што сабраліся на гасціннай зямлі Белавежжа.

Цікавы раман-хроніку “Саветы” прадставіў пісьменнік Янка Трацяк, напрыканцы насычанага другога дня семінара прагучалі песні ў выкананні Аляксандра Памідорава.

Фіналісты конкурсу "Дэбют". Фота: прэс-служба ГА "СБП"

У апошні дзень чытанняў літаратары ўзялі ўдзел у падвядзенні вынікаў Агульнапольскага конкурсу беларускай паэзіі і прозы “Дэбют” у Беластоку.

Пераможцы і фіналісты былі адзначаныя прызамі, у тым ліку новай дзіцячай кнігай “Пэтсан і Фіндус святкуюць Каляды” з серыі "Каляровы ровар" Бібліятэкі Саюза беларускіх пісьменнікаў.

Тэкст: прэс-служба ГА "Саюз беларускіх пісьменнікаў",

Фота: Радыё Рацыя