Другі нумар альманаха «Палац» двойчы прэзентавалі ў Гомелі

10 снежня ў Гомелі адбыліся адразу дзве прэзентацыі другога нумара літаратурнага альманаха “Палац”. 

Ларыса Раманава, Анатоль Бароўскі, Генадзь Лапацін

Першая сустрэча адбылася ў актавае залі гімназіі №10 горада Гомеля, дзе з вучнямі старэйшых класаў сустрэліся старшыня гомельскай філіі ГА “СБП” Анатоль Бароўскі, светлагорскі паэт Вадзім Болбас, а таксама госці з Менску – Барыс Пятровіч, Алесь Пашкевіч, Усевалад Сцебурака і Зміцер Бартосік. Вучні атрымалі не толькі прыемныя ўражанні, але і прэзенты ад кампаніі “Будзьма беларусамі”.

Барыс Пятровіч, Ларыса Раманава

Другая сустрэча літаратараў з публікай адбылася ў Гомельскім абласным краязнаўчым музеі “Палац Румянцавых-Паскевічаў”.

У белай гасцёўні палаца выступілі гомельскія аўтары: Генадзь Лапацін, Яўген Сергіеня, Ларыса Раманава, Андрэй Петрашэўскі.

Вольга Цярэшчанка

Цудоўным сюрпрызам сталася выкананне ўласных твораў гомельскай паэткай і бардам Вольгай Цярэшчанка. Да імпрэзы далучылася кіраўніцтва Саюза беларускіх пісьменнікаў. Старшыня Барыс Пятровіч распавёў пра працу над альманахамі абласных філій і прадставіў апошні нумар часопіса “Дзеяслоў”.

Зміцер Бартосік

Напрыканцы сустрэчы прагучалі перакладзеныя Рыгорам Барадуліным песні Вярцінскага ў выкананні Змітра Бартосіка.