Дзіцячая кніга з малюнкамі “Сумны суп” ужо ў крамах!

Суплёт гісторый Вольгі Гапеевай, аб’яднаных назвай “Сумны суп”, і ілюстрацыі да іх Марты Герашчанка, летась перамаглі ў літаратурным конкурсе Саюза беларускіх пісьменнікаў “Экслібрыс” імя Янкі Маўра і атрымалі шанец выйсці асобнай кнігай.

Выданне пабачыла свет у серыі “Каляровы ровар” Бібліятэкі Саюза беларускіх пісьменнікаў, у выдавецтве “Галіяфы”. Мастацкае афармленне, зручны фармат, які прыемна трымаць у руках, і вядома, самі тэксты — усё вабіць вока нават самага капрызлівага чытача. 

Трошкі зазірнуць у кніжку вам дапаможа цудоўны буктрэйлер, які можна глядзець з дзеткамі як вясёлы мульцік!

 Вольга Гапеева з задавальненнем распавяла нам пра свой новы праект: 

Кнігі для дзяцей павінны быць рознымі

“Асабіста я вельмі люблю разумныя і шчырыя дзіцячыя кніжкі.

Думаю, што кніжка можа быць цікавай для дарослых з пункту гледжання “вяртання”/ “паглыблення” ў той свет, дзе суп сапраўды мог быць сумным ці вясёлым, дзе не было думак “гэта нейкі абсурд, такога не бывае”. Хаця часта, калі дзеці пачынаюць сацыялізавацца, яны выяўляюцца яшчэ большымі дыктатарамі, якія не прымаюць “іншасці”. Дзеці, спадзяюся, пабачаць розныя мадэлі для сябе і не будуць баяцца вырасці “нейкімі не такімі” ці “не як усе”.

Кнігі для дзяцей (як і для дарослых) павінны быць рознымі, бо мы ўсе розныя, камусьці падабаюцца нязграбныя, нагрувашчаныя разважанні, а хтосьці ў захапленні ад лёгкага мінімалізму”.

 

Дзякуючы гэтым гісторыям я адчувала сябе лепш

“Мая першая кніжка “для дзяцей” – гэта паэма “Дзве авечкі”, выхад якой я чакаю ўжо другі год. Што ж датычыцца кніжкі “Сумны суп”, то яна пісалася ў даволі складаны для мяне час, але менавіта дзякуючы гэтым гісторыям я адчувала сябе лепш і была неяк больш “абароненай” пры сутыкненнях з гэтым “варожым і зласлівым” светам.

Калі я пішу для дзяцей, то не думаю, што пішу для дзяцей. Дзіцячая літаратура – гэта своеасаблівы жанр, як “філасофскае эсэ” ці “патрыятычная лірыка”, і калі пішаш у гэтым жанры, проста ведаеш, што табе тут дазволена, а што – не. Менавіта таму я пішу розныя рэчы: вершы, навуковыя артыкулы, філасофскую прозу, каб мець магчымасць пабыць рознай ці “пагуляцца” ў адпаведныя правілы”.

 

З мастаком спрачаліся толькі пра пухнатасць ката

“Спецыфіка творчага дуэту пісьменнік — мастак у неабходнасці паразумення і адкрытасці. Калі ёсць дыялог – тады ўсё атрымаецца.

З Мартай Герашчанка працавалася добра. Гэта наша другая сумесная кніжка, так што я ўжо ведала нейкія ейныя асаблівасці, а яна, думаю, – мае. Нюансы тычыліся збольшага дэталяў, напрыклад, памер ці колер шрыфту, размяшчэнне тэксту на старонцы, пухнатасць ката ці наяўнасць капелюша ў шампіньёна”.

 

Кнігу “Сумны суп” ад сёння можна знайсці ў мінскіх крамах “Галіяфы”, “ЛогвінаЎ”, Цэнтральная кнігарня, Акадэмкніга, “Веды”, “Книги&книжечки”. Цікаўцеся!

14 чэрвеня ў 18.00 прыходзьце ў галерэю Ў на прэзентацыю! 

Прэс-служба ГА "Саюз беларускіх пісьменнікаў"