Феліксу Шкірманкову — 90!

Пісьменнік нарадзіўся ў 1926 годзе  ў мястэчку Прапойск (зараз г. Слаўгарад) Магілёўскай вобласці. На пачатку вайны ў пятнаццацігадовым узросце ваяваў у знішчальным батальёне. Пасля заканчэння спецыяльнай падрыхтоўкі быў накіраваны ў варожы тыл, дзе з мая 1942 г. быў байцом партызанскага атрада Б. Саўкова, а потым брыгады Ф. Шляхтунова, якая з 1943 г. насіла імя генерала Л. Даватара.

Двойчы быў паранены. У красавіку 1943 г. пасля цяжкага ранення з Бягомльскага  партызанскага аэрадрома вывезены ў савецкі тыл на лячэнне ў шпіталь. У красавіку 1944 г. Беларускім штабам партызанскага руху накіраваны на вучобу ў Маскоўскае Чырвонасцяжнае ваенна-інжынернае вучылішча. Пасля заканчэння вучобы ў студзені 1945 г. накіраваны на 4 Украінскі фронт камандзірам асобнага ўзвода інжынернай разведкі 113-га Станіслаўскага ордэнаў Багдана Хмяльніцкага і Чырвонай Зоркі інжынерна-сапёрнага батальёна. Яшчэ раз паранены ў лютым 1945 г. Вайну закончыў ля Прагі. Узнагародджаны ордэнам Баявога Чырвонага Сцяга, двума ордэнамі Айчыннай вайны І ступені, медалямі “За адвагу”, “Партызану Айчыннай вайны”  І ступені і “За перамогу над Германіяй”.

Пасля дэмабілізацыі ў маі 1951 г. па працоўнаму дагавору паехаў у Магадан, дзе пасля заканчэння курсаў тэхнікаў-геолагаў працаваў геолагам, начальнікам геолагаразведвальнай партыі на пошуках радовішч урана, а потым золата на Калыме, паўвостраве Чукотка, узбярэжжы Ахоцкага мора. Закончыў горны факультэт Усесаюзнага завочнага палітэхнічнага інстытута і атрымаў кваліфікацыю горнага інжынера-геолага.

З Генадзем Бураўкіным

Пасля выхаду на пенсію вярнуўся ў 1979 г. на радзіму ў Слаўгарад, дзе быў абраны дэпутатам і старшынёй гарадскога Савета дэпутатаў.  На гэтай пасадзе адпрацаваў чатыры гады.

Друкавацца пачаў з 1993 года ў часопісах “Полымя” і “Нёман”. Выдаў больш за 20 кніг прозы і паэзіі.

Мы віншуем шаноўнага Фелікса Уладзіміравіча з юбілеем, жадаем яму моцнага здароўя, творчага натхнення і новых высокіх узлётаў у літаратурнай неабсяжнасці нашай Бацькаўшчыны!

ГА "Саюз беларускіх пісьменнікаў"