"Гукаю Слова..." З нагоды юбілею Мікалая Аляксандрава

Мікалай Аляксандраў.

Мікалай Аляксеевіч вядомы як аўтар зборнікаў “Кварта” (2002) і “Долгий путь в Китеж” (2009). І хаця пачынаў і цяпер працягвае пісаць спадар Мікалай на рускай мове, апошнім часам у друку з'явіліся яго вершы і па-беларуску. Жыццё творцы звязанае з Расіяй (нарадзіўся ў Валагодскай вобласці, юнацтва прайшло на Далёкім Усходзе, закончыў Літаратурны інстытут у Маскве), але з 1980 года Мікалай Аляксандраў -- у Берасці спачатку ў абласной газеце "Заря", пасля і па сённяшні дзень -- ва ўжо згаданым “Брестском курьере”. Натхнення, аптымізму і далейшай плённай дзейнасці ў журналістыцы і паэзіі Вам, Мікалай Аляксеевіч!

ГА "Саюз беларускіх пісьменнікаў"   

Мікалай Аляксандраў

Гуканне

-- А што ты тут робіш, Алёна,

Спяваючы доўгую песню,

Ў лясочку ля юнага клёна?

-- Гукаю Весну...

 

-- А што ты тут робіш, Алесе,

На лузе ля сенажаці,

Дзе п'юць жаўрукі паднябессе?

-- Гукаю Маці...

 

-- А што ты тут робіш, Галіна,

У полі, дзе марыць глеба

Пра шпаркія струны ліўня?

-- Гукаю Неба...

 

А што ты тут робіш, Антосе,

Ў бары, дзе драўляная мова

Стамілася ў безгалоссі?

-- Гукаю Слова...

 

-- А што ты тут робіш, Рыгорка,

На ўзгорку ля млына старога,

Дзе ўсходзіць Максімава зорка?

-- Гукаю Бога...

 

-- А што ты тут робіш, Кастусе,

Адрынуўшы горкую здраду

На вежы званоў Беларусі?

-- Гукаю Праўду...

Прэсавая служба СБП