In memoriam. Памяці Ніла Гілевіча

Дата публікацыі: 30.03.2016

1816

Верш

Да галінак вясны Ніла Гілевіча

Ніл Сымонавіч! Я ўкленчу
перад Марай — той зямлёй,
дзе жылі б адной сям’ёй.
Згадвалі Вы: край наш — з енчу:
браць бы поручню-парэнчу,
мы ж махалі аглаблёй.

— Раць збіраць! — не ўсе крычалі.
— У паход! — не ўсе гулі…
І нас бэсцілі, знішчалі.
…Даастатку не змялі
з нашай роднае зямлі.

Так! Мы будзем, будзем. Будзем!
Толькі ж цені крывічоў
не дадуць сваіх мячоў.
На рушэнне ці палюддзе
знойдзем новых трубачоў.

Ніл Сымонавіч! На голле
прывілі Вы вочкі слоў.
Давялі Вы да галоў:
спее сведамая Воля —
весняй нацыі улоў.

Сяргей Панізьнік

Прэс-служба ГА "Саюз беларускіх пісьменнікаў"