Кацярына Зыкава патлумачыла ўсё ў “Объяснительной”

Дата публікацыі: 24.05.2012

3524

Знайсці дарогу на прэзентацыю кнігі Кацярыны Зыкавай “Объяснительная” было нескладана, нягледзячы на тое, што імпрэза праходзіла на офісе кампаніі TUT.by, а не ў кнігарні “логвінаЎ”, торная сцежка куды дасканала вывучаная аматарамі паэзіі. Прадбачлівая Кацярына змясціла на сценах будынка папяровыя ўказальнікі. Дзякуючы ім удзельнікі прэзентацыі страцілі ўсе шанцы заблукаць і прыйшлі ў поўным складзе.

Пачала прэзентацыю сама Кацярына, прачытаўшы свае творы са свежага зборніка.

Георгі Барташ і Кацярына Зыкава

Рэдактар кнігі Андрэй Хадановіч таксама прадэкламаваў колькі вершаў, нібыта прысвечаных Кацярыне, і пацешыў публіку аповедам пра тое, як на адным з расійскіх літаратурных фестываляў Кацярына ўразіла усіх мужчын-паэтаў вершамі і выглядам, а на наступны дзень з'ехала, і фестываль страціў для паэтаў увесь сэнс.

Слова бярэ рэдактар кнігі Андрэй Хадановіч

“Часам рэдактар бярэ кнігу і правіць яе так, што яна робіцца геніяльнай. Раскажыце нам, ці той гэта выпадак?” — такім падступным пытаннем паспрабаваў справакаваць рэдактара мадэратар вечарыны Георгі Барташ, але Андрэй Хадановіч абверг інсінуацыі, адказаўшы, што вершы Кацярыны настолькі добрыя, што ён не ўпэўнены ў тым, што палепшыў іх, паправіўшы некалькі знакаў пунктуацыі.

У мікрафона - Марыя Мартысевіч

Сябры Кацярыны — літаратары Наста Манцэвіч, Уладзь Лянкевіч, Алеся Башарымава, Віталь Рыжкоў — пачыталі свае творы і сказалі шмат добрых словаў на адрас Кацярыны, Павел Анціпаў абмежаваўся толькі добрымі словамі, Марыя Мартысевіч агучыла свой пераклад верша з “Объяснительной” і сказала, што радая, што яны з Кацяй пішуць на розных мовах, бо інакш гэты пераклад быў бы немагчымы.

Наведнікі

ГА “Саюз беларускіх пісьменнікаў”, у чыёй падсерыі “Пункт адліку” выйшла кніга, прадставіла на вечарыне Юлія Цімафеева. Юлія і Павел Анціпаў каардынуюць выданне дэбютных кніг маладых аўтараў у згаданай падсерыі. “Объяснительная” Кацярыны Зыкавай — ужо другая кніга, якая выйшла ў “Пункце адліку”: перад гэтым з’явілася кніга Анкі Упалы “Дрэва энталіпт”, трэцяй кнігай будзе зборнік апавяданняў Кірыла Дубоўскага “Харошы раман”, якую аўтар, што хаваўся сярод публікі, прэзентуе 1 чэрвеня. Да выдання таксама рыхтуюцца кнігі Насты Манцэвіч і Андрэя Пакроўскага.