Міколу Аўрамчыку — 96!

Шаноўны Мікола Якаўлевіч! Сардэчна віншуем Вас з днём нараджэння і жадаем моцы, крэпкага здароўя, даўгалецця, аптымізму, а таксама дабрабыту і радасных падзей Вам і Вашым блізкім!

ГА "Саюз беларускіх пісьменнікаў"

Мікола Аўрамчык на вечарыне ў гонар свайго 95-годдзя. 2015. Фота Вікі Трэнас

***
Паліне
 
Ты, калі ласка, зноўку апрані
Зялёную ці сінюю сукенку,
Як некалі ў свайго юнацтва дні
Любіла апранаць напераменку.
 
Ты думаеш, што надакучыў мне
Іх колер,
               назаляць якім не трэба?
А ён нагадвае мне аб вясне,
Напамінае пра зямлю і неба.
 
Бо як бы ні змяніліся ўжо мы,
А па-ранейшаму заўсёды
                                            зноўку
Прываблівае зрок пасля зімы
Зямля
          сваёй зялёнаю абноўкай.
 
Людзей кранае кожны раз да слёз
І радуе іх позірк чалавечы
Бязвоблачная цішыня нябёс
Сваёй
           ад сонца выцвілай
                                          сінечай.
Мікола Аўрамчык
Прэс-служба ГА "Саюз беларускіх пісьменнікаў"