Не стала Генадзя Бураўкіна. Развітанне з паэтам адбудзецца 31 мая

Пра гэта паведаміла жонка паэта Юлія Якаўлеўна.

Апошнія месяцы Генадзь Мікалаевіч змагаўся з анкалагічнай хваробай.

Развітанне з паэтам адбудзецца 31 мая з 11.30 у мінскім Свята-Петра-Паўлаўскім саборы (вул. Ракаўская, 4). Пахаванне -- на Усходніх могілках у Мінску.

Генадзь Бураўкін нарадзіўся 28 жніўня 1936 года ў вёсцы Шуляціна Расонскага раёна Віцебскай вобласці ў сям’і служачага. У 1959 годзе скончыў аддзяленне журналістыкі філалагічнага факультэта Беларускага дзяржаўнага ўніверсітэта. Працаваў у часопісе «Камуніст Беларусі», на Беларускім радыё, у газеце «Літаратура і мастацтва». З 1968 года – карэспандэнтам «Правды» па БССР, з 1972 года – галоўным рэдактарам часопіса «Маладосць», у 1978—1990 гг. — старшыня Дзяржаўнага камітэта БССР па тэлебачанні й радыёвяшчанні. З'яўляўся пастаянным прадстаўніком Беларусі ў ААН (1990—1994). З 18 сакавіка 1994 года быў намеснікам культуры і друку Рэспублікі Беларусь.

Аўтар дзясяткаў паэтычных кніг, пісаў таксама для дзяцей. Пакінуў найбагацейшую песенную спадчыну: на вершы Генадзя Мікалаевіча выконваецца шмат папулярных кампазіцый («Белы снег», «Зачараваная», «Матылі», «Малітва» і многія іншыя).

На "Калыханцы" спадара Генадзя выхавалася не адно пакаленне беларусаў.

Выступаў у друку з нарысамі, публіцыстычнымі і крытычнымі артыкуламі. Аўтар сцэнарыяў некалькіх дакументальных фільмаў, двухсерыйнага мастацкага фільма «Полымя» (1974, сумесна з Уладзімерам Халіпам і Фёдарам Коневым).

Перакладаў на беларускую мову вершы рускіх, украінскіх, малдаўскіх, балгарскіх паэтаў.

Укладальнік кнігі «Наш Быкаў» — першай кнігі ўспамінаў пра Васіля Быкава.

Надзвычайны і Паўнамоцны Амбасадар. Дэпутат Вярхоўнага Савета БССР X і XI скліканняў (1980—1990), быў адным з ініцыятараў прыняцця Закону аб мовах. Быў старшынём ТБМ імя Ф. Скарыны. У 1995—2001 працаваў у часопісе «Вожык».

Сябар Беларускага ПЭН-Цэнтра, Сустаршыня Усебеларускага з'езду за Незалежнасць (2000), Сябар Рады беларускай інтэлігенцыі.

Лаўрэат Дзяржаўнай прэміі імя Янкі Купалы (1980).

 

З мамай, татам і сястрой.

З дзецьмі Аляксеем і Святланаю.

 

З Аркадзем Куляшовым.

Злева направа: скульптар Генадзь Буралкін, Уладзімір Мулявін, Генадзь Бураўкін і скульптар Станіслаў Ларчанка ў Нью-Ёрку.

Змястоўны матэрыял і болей архіўных фота на сайце Еўрарадыё.

Сябры, прыхільнікі і калегі ўспамінаюць паэта.

Сяргей Шапран: Выйдзе кніга апошніх вершаў Генадзя Бураўкіна.

Смуткуем і выказваем спачуванні блізкім Генадзя Мікалаевіча...