Новым старшынём Гарадзенскага абласнога аддзялення СБП стаў Валянцін Дубатоўка

У першым шэрагу, злева направа: Ала Петрушкевіч, Аляксей Пяткевіч, Леанарда Юргілевіч; далей, злева направа: Уладзімір Хільмановіч, Рычард Бялячыц, Сяргей Чыгрын, Віктар Сазонаў, Сяргей Астравец (Астраўцоў), Анатоль Брусевіч, Анатоль Валюк, Алесь Пашкевіч, Ігар Жук, Барыс Пятровіч, Валянцін Дубатоўка, Юрка Голуб 

Гарадзенскае аддзяленне сёння – адно з найбольш актыўных і прадстаўнічых у ГА “СБП”. Сярод больш чым двух дзясяткаў сябраў філіі ёсць паэты, празаікі, крытыкі і літаратуразнаўцы, журналісты. Варта ўзгадаць імёны Аляксея Пяткевіча, Ігара Жука, Алы Петрушкевіч, Сяргея Астраўца (Астраўцова), Віктара Сазонава, Юркі Голуба, Віктара Шалкевіча і іншых творцаў, што плённа працуюць на гарадзенскае зямлі.

Выступае Барыс Пятровіч

Са сталіцы на сход завіталі Старшыня ГА “СБП” Барыс Пятровіч, яго першы намеснік Алесь Пашкевіч і памочнік Старшыні Усевалад Сцебурака, што выступілі як назіральнікі (згодна са Статутам арганізацыі, выбары старшыні абласной філіі праходзяць з удзелам выключна сябраў рэгіянальнага аддзялення).

Злева направа: Юрка Голуб, Барыс Пятровіч (выступае), Рычард Бялячыц, Анатоль Брусевіч, Ала Петрушкевіч, Анатоль Валюк, Сяргей Чыгрын, Уладзімір Хільмановіч  

У прывітальным слове Барыс Пятровіч падзякаваў гарадзенцам за плённую працу, сцісла асвятліў асобныя аспекты дзейнасці іншых пісьменніцкіх філій Саюза, а таксама напрыканцы павіншаваў усіх прысутных з атрыманнем чальцом нашага саюза Святланай Алексіевіч Нобелеўскай прэміі.

Алесь Пашкевіч і Юрка Голуб

Юрка Голуб

Сход пад кіраўніцтвам спадара Голуба разгледзеў шэраг пытанняў, сярод якіх асноўнымі былі: справаздача старшыні, выбары новага кіраўніка гарадзенскай пісьменніцкай арганізацыі, абранне рэдактара і рэдакцыйнай рады літаратурнага альманаха “Новы замак” — зборніка, што выдаецца філіяй ужо на працягу трох гадоў.

Злева: Валянцін Дубатоўка; уверсе, злева направа: Рычард Бялячыц, Анатоль Брусевіч, Ала Петрушкевіч; унізе: Аляксей Пяткевіч, Леанарда Юргілевіч

Выбары старшыні адбыліся шляхам тайнага галасавання па двух прапанаваных удзельнікамі сходу кандыдатурах – Сяргея Астраўцова і Валянціна Дубатоўкі.

Бальшынёй галасоў новым кіраўніком філіі быў абраны Валянцін Дубатоўка. Яго намеснікамі сталі Уладзімір Хільмановіч і Юрка Голуб.

Уверсе, злева направа: Сяргей Астравец (Астраўцоў), Ігар Жук, Аляксей Пяткевіч; унізе: выступае Ала Петрушкевіч; злева направа: Сяргей Астравец, Ігар Жук, Аляксей Пяткевіч

Рэдакцыю альманаха “Новы замак” узначаліў Сяргей Астравец, а ў рэдакцыйную раду ўвайшлі Аляксей Пяткевіч, Ігар Жук, Юрка Голуб.

Таксама сход Гарадзенскай філіі зацвердзіў прапанову да Рады ГА “СБП” надаць званне “ганаровы сябра” Саюза беларускіх пісьменнікаў беластоцкім творцам: Віталю Лубу, Яўгену Вапу, Ганне Кандрацюк і Міхасю Андрасюку. Раней у 2006 годзе гэтым званнем былі ўганараваныя сябры беларускага літаратурнага аб’яднання “Белавежа” (Польшча).

Сакратарыят ГА “СБП” выказвае падзяку за шматгадовую працу на пасадзе старшыні філіі спадару Юрку Голубу, а таксама шчыра віншуе новаабранага кіраўніка аддзялення — Валянціна Дубатоўку — і зычыць яму плёну ў гэтай пачэснай справе!

Фота Усевалада Сцебуракі

Прэс-служба ГА "Саюз беларускіх пісьменнікаў"