Някляеў атрымаў “Глінянага вялеса”

Беларускаму паэту і палітыку Уладзіміру Някляеву ўручылі літаратурную прэмію “Гліняны Вялес”. Цырымонія ўзнагароджання з удзелам беларускіх літаратараў і грамадскіх дзеячаў прайшла ў Мінску ў сядзібе беларускага ПЭН-цэнтра.

І хоць традыцыйна “Гліняны Вялес” уручаецца ў Полацку, такое выключэнне з правілаў толькі ўмацоўвае саму традыцыю літаратурнай прэміі, зазначыў яе заснавальнік, літаратар Алесь Аркуш.

— “Вялес” — адна з найстарэйшых літаратурных прэмій у Беларусі. Лаўрэаты былі вядомыя ўжо ў сакавіку, але Някляеву мы ніяк не маглі ўручыць прэмію, бо ён быў пад хатнім арыштам. І вось мы чакалі, што пасля судоў атрымаецца правесці гэтую імпрэзу. Усё атрымалася файна, як мы і меркавалі.

Прэмія “Гліняны Вялес”, якая штогод прысуджаецца за найлепшую кнігу мастацкай літаратуры, была ўручаная Уладзіміру Някляеву за кнігу “Кон”. На імпрэзе аўтар прачытаў некалькі вершаў і падзяліўся з прысутнымі ўражаннямі ад атрымання прэміі.

Калі я дасягну сваіх палітычных мэтаў, то адразу ж сыду з палітыкі і вярнуся за пісьменніцкі стол, зазначыў Уладзімір Някляеў.

— Тое, што мае таварышы якраз не па палітыцы, але па паэзіі гэтым “Вялесам” мяне адзначылі, шчыра скажу, мяне радуе. Літаратура была і застаецца для мне тым, што называюць “сэнсам жыцця”. Па-за ёй я сябе не ўяўляю і не адчуваю.

Але “Гліняны Вялес” для Уладзіміра Някляева не стаў адзінай узнагародай на цырымоніі. Заснавальнік прэміі Алесь Аркуш уганараваў паэта ордэнам Беларускай Народнай Рэспублікі за адвагу ў барацьбе за сапраўдную Беларусь, які ўяўляе сабой копію існага ў БНР ордэна, замоўленага адмыслова да імпрэзы. Пасля афіцыйнай часткі імпрэзы Уладзімір Някляеў падарыў прысутным свае кнігі, падпісаўшы асобнікі для ўсіх ахвотных.