Пайшоў з жыцця літаратуразнаўца Ванкарэм Нікіфаровіч

У ЗША памёр беларускі літаратуразнаўца, журналіст, перакладчык, сябар СБП Ванкарэм Нікіфаровіч.

У ЗША памёр беларускі літаратуразнаўца Ванкарэм Нікіфаровіч

Ён пайшоў з жыцця тры месяцы таму, але вядома пра гэта стала нядаўна.

Ванкарэм Нікіфаровіч нарадзіўся 15 лістапада 1934 г. у г. Мінску ў сям’і настаўніка.

У 1957 г. скончыў філалагічны факультэт БДУ; працаваў рэдактарам мастацкай літаратуры Дзяржвыдавецтва БССР, працаваў на тэлебачанні.

За аповед у адной з праграм пра планы Святланы Алексіевіч напісаць кнігу «Цынкавыя хлопчыкі» быў звольнены з тэлебачання, у 1983 г. уладкаваўся памочнікам галоўнага рэжысёра па літаратурнай частцы Тэатра-студыі кінаакцёра пры Дзяржкіно БССР, з 1987 г. — кіраўнік літаратурна-драматычнайчасткі Беларускага дзяржаўнага акадэмічнага тэатра імя Янкі Купалы. Сябра СП СССР з 1972 г.

Перакладаў з балгарскай мовы, быў узнагароджаны балгарскім ордэнам Кірылы і Мефодзія (адзін з чатырох кавалераў ордэна ў Беларусі), аўтар некалькіх сцэнарыяў дакументальных і тэлевізійных фільмаў «Помнікі не маўчаць» (1971), «Дом Макаравых» (1975), «Такая ў зямлі песня» (1978), «Паэзія Янкі Купалы» (1982), «Верыць сэрцам у Перамогу» (1985), «Паэзія Рыгора Барадуліна» (1988), «Лінія лесу» (пра С. Станюту, 1990), інсцэніровак для Беларускага тэлебачання па творах А. Куляшова, І. Мележа, А. Кулакоўскага, І.Пташнікава, Р. Барадуліна.

Перакладаў на расійскую В. Быкава.

У 1993 г. эміграваў у ЗША, браў удзел у жыцці беларускай грамады ў Чыкага, пісаў літаратуразнаўчыя артыкулы, укладальнік зборніка драматургіі беларускай эміграцыі «Урачыстасць у садзе» (Мінск, 2007).

nn.by