Перакладчыку Валеру Стралко прысуджана Міжнародная прэмія імя Грыгорыя Скаварады

Узнагароджанне адбудзецца 1 кастрычніка ў Кіеве.

Раней гэту прэмію атрымлівалі беларускія пісьменнікі Сяргей Законнікаў і Ніна Мацяш.

Валер Стралко — сябра ГА “Саюз беларускіх пісьменнікаў”, вядомы шматлікімі перакладамі беларускай літаратуры на ўкраінскую мову і наадварот. Сярод перакладзеных ім беларускіх аўтараў — Максім Багдановіч, Янка Купала, Якуб Колас, Васіль Быкаў, Уладзімір Караткевіч ды інш.

Валер Стралко, фота art-s.by

Раней Валер Стралко ўжо атрымліваў літаратурныя ўзнагароды.

У 2003 г. ён быў узнагароджаны Міжнароднай літаратурнай прэміяй імя Івана Франко за пераклады на беларускую мову твораў Тараса Шаўчэнкі, Лесі Украінкі, Івана Франко і сучасных украінскіх аўтараў, а таксама літаратурнай прэміяй імя Кандрата Крапівы за пераклад паэмы “Тарас на Парнасе” на ўкраінскую мову.

У 2006 г. узнагароджаны Нацыянальнай суполкай пісьменнікаў Украіны медалём "Ганаровая адзнака" за істотны ўнёсак у адраджэнне духоўнасці і асабістыя дасягненні ў літаратурнай творчасці.