Песні на вершы Багдановіча гучаць у тралейбусах Магілёва

Гэтая ініцыятыва Магілёўскага таварыства беларускай мовы знайшла падтрымку і разуменне ў кіраўніцтва Магілёўскага гарадскога камунальнага ўнітарнага прадпрыемства "Гарэлектратранспарт". Магілёўцам прапануецца паслухаць пяць песень. Сярод іх такія вядомыя, як "Зорка Венера", "Па-над белым пухам вішняў" і "Слуцкія ткачыхі". Іх можна пачуць на самых запатрабаваных маршрутах у тралейбусах пад нумарамі 2, 4 і 5. Песні у выкананні зорак беларускай эстрады будуць гучаць штодня да канца гэтага тыдня.

Як адзначыў дырэктар прадпрыемства "Гарэлектратранспарт" Сяргей Манастырэнка, мэта гэтай акцыі вельмі простая - папулярызацыя беларускай мовы і творчасці выдатнага паэта, 120-годдзе з дня нараджэння якога святкуе ў гэтым годзе ўся Беларусь. У Магілёве з гэтай нагоды прайшлі канцэрты, тэматычныя вечары паэзіі, творчыя сустрэчы, прысвечаныя Максіму Багдановічу.

Актывісты гарадскога таварыства беларускай мовы з нагоды юбілейнай даты таксама стварылі відэаролік, які перыядычна з'яўляецца ў эфіры гарадскога тэлеканала "Магілёў-2" і размешчаны ў сетцы Інтэрнэт.

Сяргей Кулягін

БЕЛТА