Прэмію імя Астрыд Ліндгрэн атрымала аргенцінская пісьменніца Ісоль

 
У 2000—2005 кожны тыдзень у нядзельным дадатку да самай чытанай аргенцінскай газеты Clarín друкаваліся гісторыі ў малюнках, у якіх Ісоль пераказвала вядомыя казкі і дзіцячыя кніжкі. Мастачка таксама супрацоўнічала з іншымі газетамі і часопісамі. 

Шчыры і ў той жа час іранічны стыль Ісоль хутка прынёс ёй вядомасць у Аргенціне і за мяжой, яе кнігі выходзяць у Мексіцы, Гішпаніі, ЗША, Францыі, Паўднёвай Карэі і Швейцарыі. 

У апошнія гады мастачка цалкам прысвяціла сябе дзіцячым кнігам у малюнках, хоць час ад часу публікуе таксама графічныя працы і коміксы. У 2008 годзе Ісоль упершыню была намінаваная на прэмію імя Астрыд Ліндгрэн. 

Заснаваная ўрадам Швецыі ў 2002 годзе прэмія імя Астрыд Ліндгрэн — найбуйнейшая ў свеце ў галіне дзіцячай літаратуры: яе прызавы фонд складае 5 млн шведскіх крон (каля $780 тысяч). 

Год таму прэмію атрымаў нідэрландскі пісьменнік Гус Куер.