Прэмію імя Багдановіча ўручылі ў Музеі Багдановіча: ФОТА

Дата публікацыі: 25.03.2015

2097

Тацяна Нядбай

Упершыню цырымонію ўзнагароджання пераможцаў прыняў у сябе Літаратурны музей Максіма Багдановіча, у залі, прысвечанай юбілею Народнага паэта Беларусі Рыгора Барадуліна.

Лаўрэатамі прэміі сталі Аляксей Палачанскі з кнігай “Мой цвік” (намінацыя “Проза”) і Таццяна Нядбай з кнігай “Сірэны спяваюць джаз” (намінацыя “Паэзія”).

Таксама ўсе лаўрэаты атрымалі ў падарунак ад ГА “Саюз беларускіх пісьменнікаў” новую кнігу Народнага паэта Беларусі Ніла Гілевіча «У віры быцця» з аўтографам аўтара і пажаданнямі.

Аляксей Палачанскі і Павел Бераговіч

Таксама ў шорт-ліст прэміі ўваходзілі дэбютныя кнігі Віталя Воранава “Шэпт” і Ромы Свечнікава “Рома едзе: кніга 1” (намінацыя “Проза”), Антона Рудака “Верхні горад” і Юлі Цімафеевай “Кніга памылак” (намінацыя “Паэзія”).

У намінацыі “Пераклад” прэмія сёлета не прысуджалася, але, у якасці кампенсацыі, паміж выступамі ўдзельнікаў гучалі вершы геніяльнага французскага паэта Поля Верлена ў перакладзе Максіма Багдановіча.

Увогуле, у гэтым годзе ў арганізацыі прэміі было шмат новаўвядзенняў.

“Упершыню прэмія ўручаецца ў Літаратурным музеі Максіма Багдановіча, упершыню мы паспрабавалі іншы склад журы, упершыню можам віншаваць пераможцаў каштоўнымі паперамі”,— падкрэсліў старшыня Мясцовага дабрачыннага фонду “Вяртанне”, фундатар і адзін з сяброў журы Павал Бераговіч.

Павел Бераговіч

Мадэраваў вечар старшыня Пэн-Цэнтру Андрэй Хадановіч.

Аздабляў вечарыну фанкам, рокам, джазам і фолькам у адным флаконе гурт "Ілюжан".

У зале - пісьменнікі Ксенія Шталянкова і Андрэй Хадановіч

Нагадаем, прэмія “Дэбют” імя Максіма Багдановіча — адна з найважнейшых літаратурных прэміяў Беларусі. Даецца аўтарам ва ўзросце да 35 гадоў за творы ў жанрах, у якіх працаваў Максім Багдановіч: паэзія, проза, мастацкі пераклад. Заснаваная ў снежні 2010 года Беларускім ПЭН-цэнтрам, Саюзам беларускіх пісьменнікаў і Мясцовым дабрачынным фондам “Вяртанне” (г. Мінск). Сёлета прэмія ўручалася ў пяты раз.