Прэзентацыя кнігі беларускамоўнай іспанкі Анхелы Эспіносы Руіз — 21 лістапада

Прэзентацыя адбудзецца ў межах праекта “Саўндчэк” у прасторы “Арт Сядзібы”. Адрас: пр. Незалежнасці, 58, гандлёвы цэнтр "Маскоўска-Венскі", 4-ты паверх (у правым пад'ездзе ёсць ліфт), пакой 430. Уваход бясплатны, але колькасць месцаў абмежаваная, запісацца на сустрэчу варта ў адмысловай суполцы Ўкантакце.

Студэнтка з Малагі ніколі не была ў Беларусі, вывучыла мову па падручніках з інтэрнэту і выдала кнігу беларускіх вершаў «Раяль ля мора». А ва ўнівэрсітэце Гранады яна арганізавала курсы «Мова Нанова» для трох іспанскіх студэнтак. 

Анхела вядзе блог пад назвай «Іншаземка, якая піша па-беларуску». Аўтарка  так вольна і правільна гаворыць па-беларуску, як не можа большасць выпускнікоў беларускіх школ. Гэтага яна дамаглася ўсяго за два апошнія гады.

Сёлета Анхела стала фіналісткай літаратурнага конкурсу імя Рыгора Барадуліна, які праводзіўся ГА "Саюз беларускіх пісьменнікаў". Творы канкурсантаў ацэньваліся ананімна, і ніхто з сябраў журы не мог нават уявіць, што вершы, дасланыя Анхелай, напісаныя не беларускай!

У сваім інтэрв’ю для радыё “Свабода” Анхела так акрэсліла свае стасункі з беларускай мовай: “Я зразумела адразу, што каб асэнсаваць беларускую культуру, гісторыю Беларусі, зразумець, што адбываецца ў Беларусі, тэрмінова трэба ведаць беларускую мову. Я пачала вучыць, і для мяне гэта было відавочна. Для мяне гэта факт! Трэба дыхаць, таму што памрэш, калі не дыхаць. Трэба ведаць беларускую мову, калі хочаш жыць у беларускай культуры».

Праект «Саўндчэк» (SoundCheck) — гэта сустрэчы за кавай або гарбатай з цікавымі творчымі людзьмі, з якімі карысна паразмаўляць у нефармальнай абстаноўцы. Гасцямі выступаюць культурныя дзеячы, аўтары паспяховых праектаў і проста людзі, якія натхняюць.

Паводле прэс-рэлізу

Відэа з архіваў ГА "Саюз беларускіх пісьменнікаў"