Раман Уладзіслава Ахроменкі выйшаў па-ўкраінску

Сам Ахроменка, хоць і жыве ва Украіне 18 гадоў, лічыць сябе выключна беларускім пісьменнікам.

– Я 18 гадоў жыву ва Украіне і гэта дае падставы некаторым украінскім сябрам-пісьменнікам запісваць мяне ва ўкраінскія пісьменнікі, які піша беларускай. Я вельмі паважаю Украіну і ўкраінскую літаратуру. Але я ўсё ж такі беларускі пісьменнік. Нават калі я буду жыць у Камбоджы, ці на Шры Ланцы, ці ў Індыі, я ўсё адно буду пісаць на беларускай, і напісанае будзе суб’ектам беларускай літаратуры, адпаведна не камбаджыйскай, не ланкійскай і не індыйскай.

Пераклад рамана зрабілі Вольга Ахроменка і Дзмітрый Шчарбіна. Прадмову да кнігі напісаў вядомы ўкраінскі пісьменнік Аляксандр Ірванец. Мяркуецца, што раман “Тэорыя змовы” будзе прэзентаваны ўкраінскай публіцы на мастацкім фестывалі “і”, які пройдзе ў Тэрнопалі 6-8 траўня.

Васіль Кроква, Беларускае Радыё Рацыя