"Райскія яблычкі" для гарадзенцаў ад Сяргея Астраўца

23 лістапада ў пятніцу ў галерэі “Крыга”  (вул. Савецкая, 3-11)  адбудзецца прэзентацыя кнігі прозы “Райскія яблычкі”, якую напісаў гарадзенец Сяргей Астравец.

 Кніга выйшла сёлета ў інтэрнэт-бібліятэцы “Камунікат”.

Вось што кажа пра "Райскія яблычкі" сам аўтар: "Паміж Нёманам і Гараднічанкай знаходзіцца мая творчая тэрыторыя, словам, гэта тое, што ацалела ад Старога горада. Былога каралеўскага, дзе ўсплывае выява Стэфана Баторыя і значнае месца займае Станіслаў Аўгуст Панятоўскі. З’яўляецца таксама копія яго кароны, у якой былога караля пахавалі. У труне ацалела толькі яна. Каб потым апынуцца на галаве вясковага каваля пад шафэ. Гісторыі пошукаў парэштак апошняга манарха Рэчы Паспалітай нададзены літаратурныя рысы.

Што яшчэ? Райскія яблычкі. Яны ў мяне за вакном у аднайменным “рэпарцёрскім апавяданні”. А ў генерала Ўрангеля — за спінай, у пакінутым назаўжды паўвостраве ў “Флоце каўчэгаў”. Чытач таксама сутыкнецца з арміяй пішучых машынак з беларускімі літарамі, якія апынуліся ў руках НКВД. 

Каб напісаць трынаццаць такіх апавяданняў, спатрэбілася амаль дзесяць год".

Прэсавая служба СБП паводле аўтара