“Свядомаграфія” Ірыны Хадарэнка

Пабачыў свет зборнік вершаў і перакладаў Ірыны Хадарэнка пад назвай “Свядомаграфія”, выдадзены ў бібліятэцы Саюза беларускіх пісьменнікаў “Кнігарня пісьменніка”.  Папярэдняя кніжка паэткі выходзіла амаль 13 гадоў таму.

Такі працяглы творчы перапынак сама аўтарка тлумачыць у вершы “Іманентнасць маўчання” наступным чынам:

Паэтам часам трэба памаўчаць,

Бо нават птушкі не пяюць бясконца.

Не зелянее ўзімку сенажаць,

Не свеціць і не грэе ноччу сонца.

Новы зборнік складаецца з вершаў, напісаных у апошнія гады. Некаторыя з іх знаёмыя чытачам па публікацыях у часопісе “Дзеяслоў” і газеце “Літаратурная Беларусь”.  Аматарам сучаснай беларускай літаратуры прыйдзецца даспадобы самабытная метафарычнасць твораў, іх патрыятычная ідэйная скіраванасць і пранікнёная любоў да роднай зямлі:

Тут прага да волі трымціць, быццам кропля вады ў павуцінні,

А памяць застыла казуркай у цёмным бурштыне.

Апроч відавочнай схільнасці да напісання вершаў класічнага кірунку, Ірына Хадарэнка не баіцца бавіцца з інтэлектуальнымі алегорыямі і эксперыментаваць са словам:

На цёмным цвінтары,

Зацыраваным цвіллю,

Мацнеюць кіпцюры

Тубыльцаў у цывільным.

У дадатак да ўласных вершаваных твораў, аўтарка прадставіла ў кнізе і шэраг цікавых перакладаў з рускай і польскай паэзіі.

Кнігу “Свядомаграфія” можна знайсці ў аддзеле мастацкай літаратуры кнігарні “Акадэмкніга” (пр-т Незалежнасці, 72).

Пра аўтара: 

Ірына Хадарэнка – пісьменніца, перакладчыца, публіцыст і навукоўца. Нарадзілася ў 1976 годзе ў Мінску. З 1989 г. выступае ў рэспубліканскім друку. Аўтар зборнікаў паэзіі і прозы: “Лабірынты душы” (“Першацвет”, 1996); “Чорная ружа” (“Мастацкая літаратура”, 1998); “Танцы на шкле” (“Белы вецер”, 1999). Некаторыя яе вершы былі пакладзены на музыку беларускімі кампазітарамі. Удзельнічала ў шэрагу міжнародных літаратурных фестываляў. Сябра Саюза беларускіх пісьменнікаў і беларускага ПЭН-цэнтра.