У Лявона Вольскага выйшла першая кніга

У серыі “Кнігарня пісьменніка” Саюза беларускіх пісьменнікаў пры падтрымцы Згуртавання беларусаў свету “Бацькаўшчына” выйшла першая кніга вядомага беларускага музыкі Лявона Вольскага “Міларусь”.

Кніга стала своеасаблівым падарункам аўтару на яго 46-годдзе, якое Лявон Вольскі адсвяткаваў 14 верасня.

У інтэрв’ю рэсурсу naviny.by Лявон Вольскі адзначыў:

“Гэта кніга прозы. У ёй адна аповесць “Пакуль сабачка жывы” і шэраг апвавяданняў, напісаных з большага напрыканцы 1990-х — пачатку 2000-х гадоў. Ёсць і некалькі ранейшых і зусім ранніх апавяданняў, такіх, што самому смешна зараз іх чытаць. Але мне не сорамна ні за што з прэзентаванага у гэтай кнізе. Прачытаўшы кнігу, людзі змогуць акунуцца у дзікаватую атмасферу гэтых 1990-2000-х гадоў. Там ёсць і брудныя вуліцы, і бітае шкло, шмат таго, чаго зараз ўжо і няма”.

Назву зборніку дало адно з апавяданняў пра тое, як “розныя беларускія актывісты, якія хочуць нешта змяніць, вырашаюць змяніць назву краіны”, таму што лічаць, менавіта яе вінаватай ва ўсіх народных бедах.

Наклад мастацкай кнігі аднаго з самых культавых беларускіх музыкаў – 1000 асобнікаў. Таксама ў хуткім часе яе pdf-варыянт з’явіцца ў інтэрнэце.

Па словах аўтара, ён спадзяецца, што “будзе і урачыстая імпрэза, і паступленне кнігі ў продаж. Пра гэта будзе аб’яўлена бліжэйшым часам”. А таксама думае, што гэта не апошняя яго кніга: “У зборнік “Міларусь” увайшло не ўсё з напісанага мною. Ды й наогул — што за пісьменнік такі з адной кнігай?”

“Няхай лепей людзі чытаюць самую кепскую беларускую літаратуру, чым глядзяць самае лепшае беларускае тэлебачанне”, — падсумаваў Вольскі.