У Любліне выйшла кніга пра беларускую драматургію

Выдавецтва Каталіцкага Люблінскага ўніверсітэта выдала ўнікальную кнігу даследчыцы беларускай культуры Беаты Сівэк “Wolność ukrzyżowana Rzecz o białoruskim dramacie i teatrze” (“Воля на крыжы. Слова пра беларускую драматургію і тэатр»).

У ёй выкладчыца Каталіцкага Люблінскага ўніверсітэта даследуе сучасную беларускую драматургію, разглядаючы творы не толькі вядомых беларускіх драматургаў, але і рэгіянальных аўтараў, сярод іх Лявона Вашко з Мастоў і Ігара Сідарука з Кобрына.

Яшчэ ў рукапісе кнігу чытаў адзін з герояў гэтага даследвання - драматург і літаратуразнаўца Сяргей Кавалёў:

- Аўтарка працуе ў Каталіцкім Люблінскім універсітэце і гэта яе доктарская праца. Яна сама беларусістка. Першую кнігу пісала пра паэзію «белавежцаў», пра Чыквіна, пра Баршчэўскага. Потым занялася драматургіяй. Гэта менавіта сучасная драматургія, недзе ад Петрашкевіча і Дударава і да найноўшых аўтараў, і яна разглядае толькі беларускамоўную драматургію.

Сяргей Кавалёў таксама паведаміў, што гэта першая на польскай мове кніга пра сучасную беларускую драматургію.