Вечарына Вольгі Іпатавай

У Доме Літаратара адбылася вечарына Вольгі Іпатавай. 

Пра шматграннасць яе таленту распавяла прысутным  прафесар Лідзія Савік. Яна падкрэсліла, што Вольга Іпатава, працягваючы традыцыі сваіх папярэднікаў, у першую чаргу Уладзіміра Караткевіча, усё ж  першая ў беларускай літаратуры распачала  своеасаблівую планамерную “серыю” твораў, прысвечаных нашай даўніне — ад паганскіх часоў да Грунвальдскай бітвы, і зараз працуе над творам пра Крэўскую унію.

 Сама аўтарка запланавала  гэтую сустрэчу як своеасаблівае дапаўненне да сваіх мемуараў, якія таксама ляжаць на яе рабочым стале, і таму выступленні многіх прысутных — Людмілы Паўлікавай-Хейдаравай, Валерыя Санько, Антаніны Хатэнка,  старшыні рады беларускай інтэлігенцыі Уладзіміра Коласа, Ніны Загорскай – тычыліся эпізодаў сумеснай працы з  гераіняй сустрэчы на тэлебачанні, у газеце “Культура”, ў часопісе “Спадчына”,  а  таксама шчырых чалавечых стасункаў паміж імі. Так, рэжысёр  і паэтка Віргінія Тарнаўскайтэ, адна з укладальніц кнігі “Літоўская паэзія”, прачытала вершы паэта Бярнардаса Бразджоніса на літоўскай мове, а Вольга Іпатава – іх жа ў сваім перакладзе на беларускую мову.  Гэтых выдатных жанчын звязвае шматгадовае сяброўства з часоў працы ў Тэатры юнага гледача. На імпрэзе выступіў і бард і паэт Эдуард Акулін.

Увогуле, вечарына атрымалася  шчырай і цёплай. На яе  з Вілейкі  прыехалі  сябры творчай суполкі імя А. Гурыновіча на чале з яе кіраўніцай Зінаідай Крупскай, а з пасёлка Свіслач – паэтка Ніна Сакава. Абедзьве яны лаўрэаткі  міжнароднай прэміі імя Міколы Ганька.

Ягор Фядзюшын.