Вечарына да Дня роднай мовы — 21 лютага

У праграме мерапрыемства “Мова продкаў маіх і нашчадкаў маіх – беларуская родная мова!”:

-Сустрэча са старшынём Таварыства беларускай мовы імя Ф.Скарыны Алегам Трусавым.

-Адкрыццё кніжнай выставы “Ці знаў хто, братцы, з вас Тараса?...”. Выстава, падрыхтаваная Цэнтральнай навуковай бібліятэкай імя Якуба Коласа Нацыянальнай акадэміі навук Беларусі, прысвечана 125-годдзю першай публікацыі знакамітай паэмы “Тарас на Парнасе”, якая яшчэ нядаўна лічылася ананімнай, твору жыццярадаснаму, камічнаму, сапраўднаму шэдэўру беларускай літаратуры ХІХ ст. На выставе будуць прадстаўлены публікацыі паэмы, якія захоўваюцца ў фондах бібліятэкі, а гэта асобныя кніжныя выданні 1909 г., 1920 г. і сучасныя перавыданні. Асобны раздзел выставы прысвечаны тэме аўтарства паэмы, і гісторыі раскрыцця гэтай таямніцы. Вядома, што паэма прыпісвалася пяру самым розным аўтарам – В.Равінскаму, Т.Манькоўскаму, В.Дуніну-Марцінкевічу, А.Вярыгу-Дарэўскаму, студэнтам Горацкага земляробчага інстытута і іншым. Дзякуючы працы многіх пакаленняў літаратуразнаўцаў, а ў апошні час працы Генадзя Кісялева, аўтарам “Тараса на Парнасе” лічыцца К.Вераніцын. На выставе будзе магчымасць пазнаёміцца з цікавымі даследчыцкімі працамі не толькі Г.Ксялёва, але і публікацыямі Я.Янушкевіча, А.Лойкі, А.Мальдзіса і іншых.

-Прэзентацыя цікавых фактаў з гісторыі стварэння паэмы і пошукаў яе аўтара, пазнавальная віктарына, чытанні паэмы і прызы.

-Выступленне дзіцячых вакальных калектываў Палаца дзяцей і моладзі “Арыён” г. Мінска.