Вера Бурлак і Адам Глобус у Школе маладога пісьменніка

На гэтым тыдні Школу маладога пісьменніка з лекцыяй на тэму “Нонсэнс у літаратуры” наведала паэтка і філолаг Вера Бурлак (Джэці).

Вера Бурлак

Пачаўшы з тэарэтычнага абгрунтавання таго, чым розніцца нонсэнс ад абсурду, бессэнсоўнасці, алагізму і завумнай мовы, Вера прадставілі навучэнцам Школы і практычны матэрыял. Як адзначыла Вера, нонсэнс, больш характэрны для англамоўных фальклорных і аўтарскіх твораў, у беларускай літаратуры сустракаецца не так і часта. Аднак знайсці такія-сякія прыклады і ў айчынных анталогіях твораў для дзяцей ёй усё ж удалося:

Эскі, доскі,

Колга, Волга,

Лімінатар,

Гутар-гатар.

Лімі-лімі,

Лім-пам-по,

Паіст. 

Падчас свайго майстар-класу пад інтрыгоўнай і шматслоўнай назвай “Раман у сучасным свеце. Раман як форма любові і літаратуры. Пра раман і раманіста” празаік, паэт і мастак Адам Глобус раскрыў некаторыя сакрэты пісьменніцкай прафесіі. З аднаго боку, пісьменнік падказаў маладым творцам, адкуль браць ідэі для раманаў, што могуць добра прадавацца, а з другога, распавёў, што галоўнае для напісання проста добрых раманаў.

 

Адам Глобус

“Пісанне раману — як будаванне сабора”, — адзначыў мастак-манументаліст па адукацыі Адам Глобус. — “Калі свой твор не адчуваеце як сабор, то лепш не рабіце з яго раман”.

Прэсавая служба СБП