Вершы пасля вершаў Леаніда Галубовіча

Дата публікацыі: 23.03.2012

3393

12 гадоў таму выйшла кніга “апошнія вершы леаніда галубовіча”, але паэт Леанід Галубовіч не знік. Сведчаннем таму — новая кніга паэзіі, якую аўтар назваў “З гэтага свету. Вершы пасля вершаў” .

“Паэт змаўкае толькі праз адчай. Паэт пачынае гаварыць толькі праз адчай” — піша аўтар прадмовы да кнігі Ціхан Чарнякевіч і дадае:

“…Вершы пішуцца не тады, калі “знойдзены дакладныя адрасы”, а — у часе адолення тых кіламетраў пругкай празрыстасці, якія аддзяляюць паверхню ад цёмнага дна.

І вось тут надыходзіць чарга спаборніцтва.

Калі паэзія Галубовіча з’явілася — заўважылі адразу, і таму ёсць прычыны.

Чысты голас. Вызнанне непасрэднай гаворкі, адмаўленне мішуры.

Не кшталтаванне паэтычнай мовы, а трапнасць выказвання, тоеснасць яго — рэчаіснасці…

Вось новая кніга Леаніда Галубовіча. Прачытайце яе.”

З гэтага свету: вершы пасля вершаў / Леанід Галубовіч; прадм. Ц. Чарнякевіча. - Мінск: Кнігазбор, 2012. - 108 с. - (Бібліятэка Саюза беларускіх пісьменнікаў "Кнігарня пісьменніка"; вып. 23).

Гэтая кніжка - плён дванаццацігадовага публічнага маўчання паэта. Столькі часу ён не выступаў з вершамі ў друку, а дзесяць гадоў і ўвогуле іх не пісаў. Усе змешчаныя тут тэксты ёсць пазнакамі водгукаў яго душы на зрухі і праявы нядаўняга часу. Своеасаблівы метафарычны аналіз аўтарам свайго ўнутранага жыцця. Вершы публікуюцца ўпершыню.

Пра аўтара:

Галубовіч Леанід, нарадзіўся 12.08.1950 г. у вёсцы Вароніна Клецкага раёна Менскай вобласці ў сялянскай сям'і.

Пасля заканчэння Грыцэвіцкай сярэдняй школы Клецкага раёна (1967), затым слуцкай прафесійна-тэхнічнай навучальні № 97 (1969) працаваў электрыкам на Жабінкаўскім цукровым заводзе. Служыў у Савецкай Арміі (1970-1972). Працаваў электрыкам на прадпрыемствах Слуцка, Жабінкі, Клецка. У 1989 г. скончыў Вышэйшыя літаратурныя курсы ў Маскве. З 1989 г. - рэдактар літаратурна-драматычных праграм на Беларускім тэлебачанні. Сябра СП СССР з 1984 г. Працаваў у аддзеле крытыкі ў штотыднёвіку «ЛіМ»

У друку выступае з 1967 г.