Віктару Шведу — 90!

Дата публікацыі: 23.03.2015

2713

Віктар Мікітавіч Швед

Шаноўны Віктар Мікітавіч! Прыміце нашыя шчырыя віншаванні з юбілеем і пажаданні моцнага здароўя, даўгалецця, дабрабыту, аптымізму і плёну ў творчай дзейнасці!

ГА "Саюз беларускіх пісьменнікаў"

Віктар Швед нарадзіўся 23 сакавіка 1925 года ў вёсцы Мора паблізу Гайнаўкі (Беластоцкага ваяводства) у сялянскай сям’і. Скончыў Беларускі ліцэй у Бельску-Падляшскім, аддзяленні журналістыкі і беларускай філалогіі Варшаўскага ўніверсітэта. Доўгі час працаваў у варшаўскім выдавецтве „Ксёнжка і ведза”.

Сябра Саюза польскіх пісьменнікаў, літаратурна-мастацкага аб'яднання «Белавежа».

Піша на беларускай і польскай мовах. Беларускія вершы Віктар Швед пачаў пісаць яшчэ ў школе, у 1940 г., друкавацца пачаў у 1957 г. на старонках штотыднёвіка „Ніва”, затым — у літаратурных альманахах, „Беларускіх календарах”.

Выдаў зборнікі вершаў „Жыццёвыя сцежкі” (1967), „Дзяцінства прыстань” (1975), „Дружба” (1976), „Мая зялёная Зубровія” (1990), „Вясёлка” (1991) і інш. Адрасаваны яны пераважна юнаму чытачу. Выхаваны на традыцыях беларускай класічнай літаратуры, Віктар Швед працягвае іх на Беласточчыне: паэтызуе паўсядзённы побыт селяніна, повязь дзіцячых адчуванняў з гарманічным светам прыроды.

Віктар Швед робіць важкі ўнёсак у замацаванне еўрапейскіх літаратурных узаемасувязяў, перакладае беларускія, рускія і ўкраінскія вершы на польскую мову, а польскія — на беларускую.