Віншуем Усевалада Гарачку з юбілеем!

Паважаны Усевалад Міхайлавіч! Віншуем Вас са святам і зычым моцнага здароўя, дабрабыту, плённай творчай дзейнасці, поспехаў у справах, радасці і гармоніі Вам і Вашым блізкім!

ГА "Саюз беларускіх пісьменнікаў"

Маналог Атланта

Я Атлант,

І таму —

Я трымаю.

І не важна што:

Дах,

Нейкую справу,

Малітву...

Паверце,

Нялёгка трымаць.

І няпраўда,

Што я — каменны.

Гэта скажа вам

Кожны з Атлантаў.

І паверце,

Кожнай вясною,

Пераклаўшы цяжар на іншых,

Мне хочацца сесці

На лаўку

Ля дому,

У чаканні,

Што ля муру

Распусціцца ружавы куст.

Але ведаю:

Распусцяцца ружы

І стане так добра...

І абрынецца...

Не, не дах —

Мой сусвет,

Маё неба.

Таму — я трымаю.

І покуль трымаю —

Я жывы,

Я каменны,

Я вечны...

Ноч

Таемнае святло,

Нібы душа

Яго ўвесь дзень збірала,

А цяпер —

Раздорвае.

Нібы яна,

Душа, —

Агонь,

А я —

Людское кола.

Тварам да святла,

Спінай — да цемры.

Вечна,

Нерухома

Сядзець бы так

У гэтай паўнаце,

Дзе твар да твару,

Перад святлом,

Што льецца цераз край.

* * *

Збудаваў я помнік

Ледзяным героям,

Што загінулі ад ільду.

Прыйшла вясна

І ўсё растапіла.

Але памяць мая аб іх —

Не растане.

Усевалад Гарачка

Прэс-служба ГА "Саюз беларускіх пісьменнікаў"