«Гэта найважнейшая серыя за 13 год існавання выдавецтва. — кажа Ігар Логвінаў. — Яе ідэя нарадзілася пасля з’яўлення кнігарні: пакупнікі ўвесь час пытаюцца „Што пачытаць?“. Такім чынам мы вырашылі, што варта выдаць у зручным фармаце класіку літаратуры за апошнія 500 год».
Ігар Логвінаў
Выдавецтва «Логвінаў» запускае серыю кніг «Я кнігу маю» — класіка беларускай літаратуры ў фармаце покетбукаў — недарагіх кішэнных кніг у мяккай вокладцы для масавага чытача. Серыя мае быць, спадзяюцца заснавальнікі, камерцыйна ўдалая. У ёй ужо выйшаў дыскусійны зборнік вершаў Максіма Танка «Абвяржэнне», раман «не для ўсіх» «Адам Клакоцкі і ягоныя цені» Ігара Бабкова, «Ордэн белай мышы» Уладзіміра Арлова, зборнік інтымнай прозы Адама Глобуса «Толькі не гавары маёй маме» і абраныя вершы Андрэя Хадановіча пад назвай «Дэжа вю».
У «Я кнігу маю» не выйдзе ніводная кніга, якая не выдавалася б да таго.
«Мы будзем перавыдаваць кнігі, зрабіўшы серыю адначасова бізнэс-праектам, — кажа ўкладальнік серыі Валянцін Акудовіч. — Я даўно лічу, што калі наш бізнэс не будзе зарабляць на нас, тады ў беларускай літаратуры няма перспектыў. Серыя прэзентуе беларускую літаратуру ад Міколы Гусоўскага да сучасных аўтараў. Цяпер мусіць выйсці „Шляхціц Завальня“ Баршчэўскага ў новым перакладзе, будуць кнігі пісьменнікаў-эмігрантаў, будуць спрэчныя і палемічныя кнігі, але ўсе яны будуць выдадзены без халтуры».
Злева направа: Валянцін Акудовіч, Ігар Бабкоў, Адам Глобус, Андрэй Хадановіч
Адна з першых кніг серыі ўжо выклікала палеміку: зборнік Максіма Танка «Абвяржэнне», складзены Андрэем Хадановічам. У яе не трапіла частка найлепшых вершаў, якія ўкладальнік палічыў палітызаванымі. Але розгалас — не апошняе, чаго дабіваліся складальнікі, атрымаўся: «Абвяржэнне» — самая прадаваная кніга серыі.
«Мне падаецца, што ў гэтай серыі ў першую чаргу трэба выдаць беларускія бестселеры, — кажа Адам Глобус. — „Тутэйшыя“ Купалы, „Дзікае паляванне караля Стаха“ — бясспрэчныя бестселеры. Ці „Вянок“ Багдановіча». Што тычыцца маёй кнігі, мне не падаецца, што гэта найлепшае, што я напісаў, але я вельмі ўдзячны, што стваральнікі серыі так ацанілі маю працу».
«Важна стварыць новы, вясёлы канон беларускай літаратуры. — мяркуе Ігар Бабкоў. — Першы раз мая кніга выйшла ў паўпадпольным выглядзе. Цяперашняе выданне выглядае выдатна». Уладзімір Арлоў жартам акцэнтаваў увагу на адсутнасці цэнзуры ў выдавецтве:
«Прынамсі, ніхто не пытаўся тым разам, чаму мядзведзі ў кнізе з’ядаюць менавіта рускую Машу».
Адна з задач серыі паводле Валянціна Акудовіча — «ураўненне» пісьменнікаў. Купала, Колас, Глобус, Някляеў, Бабкоў і іншыя аўтары выходзяць у кнігах аднолькавага памеру, каштуюць аднолькава. Такім чынам складаецца поўная карціна беларускай літаратуры. Варта адзначыць, што і сваю кнігу Акудовіч уключыў у гэту серыю.
Глобус мяркуе, што чытач сам разбярэцца, хто варты: «Калі выдаць за адну цану і ў аднолькавым фармаце Платона і Дар’ю Данцову, то Платон па продажах яе «зробіць».
Андрэй Хадановіч і Уладзімір Арлоў
Абмежаванняў у серыі няма — адзін і той самы аўтар можа быць прадстаўлены некалькімі кнігамі, цяпер галоўнае для выдаўцоў наладзіць серыі належную рэкламу.
«Спадзяемся ў выніку выйсці на цэны 2–3 даляры за кнігу, — кажа Ігар Логвінаў. — Гэтая серыя будзе ўвесь час узнаўляцца, будуць дадрукоўвацца распрададзеныя кнігі, каб кожная з іх увесь час была ў наяўнасці».
Набываць кніжкі серыі можна ў кнігарні «Логвінаў» (пр. Незалежнасці, 37а). Таксама выдаўцы плануюць сёлета адчыніцьінтэрнэт-краму, дзе кожны ахвотны зможа спампаваць упадабанае выданне.