Яўгену Лецку — 70! Віншуем!

Яўген Рыгоравіч Лецка

Шаноўны Яўген Рыгоравіч! Шчыра віншуем Вас з юбілеем і жадаем моцнага здароўя, даўгалецця, шанцунку ва ўсіх справах, дабрабыту і аптымізму Вам і Вашым блізкім!

ГА "Саюз беларускіх пісьменнікаў"

Яўген Лецка нарадзіўся ў вёсцы Пабрэззе Наваградскага раёна Гарадзенскай вобласці ў сялянскай сям'і.

У 1968 г. скончыў беларускае аддзяленне філалагічнага факультэта БДУ. У час вучобы працаваў на Менскім шарыкападшыпнікавым заводзе (1961-1962), настаўнікам нямецкай мовы Ўшанскай СШ Бярэзінскага раёна. Пасля заканчэння ўніверсітэта - карэспандэнт-арганізатар раённага радыёвяшчання.

У 1969-1971 гг. вучыўся ў аспірантуры пры кафедры беларускай літаратуры БДУ. У 1971-1986 гг. - навуковы супрацоўнік Інстытута літаратуры імя Янкі Купалы АН БССР. З 1986 г. - старшы рэдактар, з 1987 г. - загадчык рэдакцыі крытыкі выдавецтва «Мастацкая літаратура». Кіраваў школай юнага літаратара пры СП БССР (1984-1986). У 1990 г. абраны старшынёй Згуртавання беларусаў свету «Бацькаўшчына». Кандыдат філалагічных навук. Сябра СП СССР з 1977 г.

Выступае ў друку з літаратурна-крытычнымі артыкуламі і даследаваннямі з 1971 г. Аўтар брашур «Беларуская літаратура за гады Савецкай улады» (1973), «Вялікая Айчынная вайна ў беларускай прозе» (1979), манаграфіі «Выхаваўчая роля літаратуры» (1980), нарыса творчасці В.Адамчыка «Хараство і боль жыцця» (1985) ды многіх іншых.

Аўтар аповесцей «Па цаліку» (1977), «Дарога ў два канцы» (1981). Перакладае з польскай, нямецкай, украінскай, расейскай моў.

Прэс-служба ГА "Саюз беларускіх пісьменнікаў"