Юбілейная вечарына Эдуарда Мядзведскага адбылася ў Магілёве

Вечарыну падрыхтаваў магілёўскі гарадскі літаратурны клуб “Святліца” пад кіраўніцтвам пісьменніцы, сябры СБП Тамары Аўсяннікавай, якая выступіла вядучай вечара.

Тамара Аўсяннікава і Эдуард Мядзведскі

У выкананні юбіляра гучалі вершы, аповеды пра жыццё і філасофскія разважанні пра паэзію і творчасць. Слухачы з вялікай цікавасцю даведаліся пра сямейную легенду Мядзведскіх, па якой адзін з продкаў Эдуарда разам з Ілжэдзмітрыем І “хадзіў на Маскву, потым прысутнічаў на вяселлі гэтага цара, дзе і памёр, не вытрымаўшы шчодрага застолля”.

Удзельнікі “Святліцы” Марыя Грамакова і Святлана Тарасава прачыталі вершы, прысвечаныя спадару Мядзведскаму.

Старшыня літаратурнага аб’яднання “Ветэран” пры Магілёўскім гарадскім савеце ветэранаў Леанід Іскроў падарыў спадару Эдуарду новы паэтычны зборнік удзельнікаў аб’яднання.

Мікола Яцкоў і Эдуард Мядзведскі

Старшыня абласнога аддзялення СБП Мікола Яцкоў павіншаваў юбіляра, прачытаў свой верш, напісаны ў гонар падзеі, і ў якасці падарунка ўручыў экзэмпляр новага альманаха Магілеўскага абласнога аддзялення СБП “Брама”. Па словах спадара Яцкова, у наступным выпуску гэтага альманаха пажадана ўбачыць вершы Эдуарда Мядзведскага, але паколькі ён не піша па-беларуску, то варта падумаць пра перастварэнне яго вершаў.

Мікола і Ала Яцковы прачыталі свае пераклады вершаў юбіляра на беларускую мову, якія знайшлі прыхільны водгук і ў аўтара, і ў гледачоў.

Паводле інфармацыі Магілёўскага абласнога аддзялення СБП

Прэс-служба ГА "Саюз беларускіх пісьменнікаў"