Адбылося сакавіцкае паседжанне Рады СБП

Сёння ў офісе Беларускага ПЭН-Цэнтра на Залатой Горцы прайшло першае ў 2019 годзе паседжанне кіроўнага органа ГА "Саюз беларускіх пісьменнікаў". У праграме было некалькі важных пунктаў, сярод якіх — справаздача старшыні ГА "Саюз беларускіх пісьменнікаў" Барыса Пятровіча, справаздачы рэгіянальных абласных філій арганізацыі, абмеркаванне бягучых пытанняў, звязаных з рэгіянальнай дзейнасцю Саюза.

Другім, не менш важным пытаннем паседжання было прыняцце новых сябраў арганізацыі. Пасля прадстаўлення кандыдатак старшынёй Прыёмнай камісіі СБП Аксанай Спрынчан, сябры Рады таемна прагаласавалі і прынялі ў сябры ГА "Саюз беларускіх пісьменнікаў" перакладчыц Надзею Кандрусевіч-Шыдлоўскую і Кацярыну Маціеўскую і аўтарку прозы Зараславу Камінскую.

Шляхам адкрытага галасавання па прапанове Сакратарыята СБП у ганаровыя сябры ГА "Саюз беларускіх пісьменнікаў" быў прыняты паэт Андрэй Сцепанюк (Бельск, Польшча).


Прэс-служба ГА "Саюз беларускіх пісьменнікаў"