Адбылося снежаньскае паседжанне Рады СБП

Сёння ў культурніцкай прасторы "Тартак" на вуліцы Магілёўскай прайшло заключнае ў 2018 годзе паседжанне кіроўнага органа ГА "Саюз беларускіх пісьменнікаў". У праграме было некалькі важных пунктаў, сярод якіх — уганараванне лаўрэатаў Літаратурнага конкурса "Экслібрыс", які сёлета быў прысвечаны знакавай падзеі — 100-годдзю абвяшчэння незалежнасці Беларускай Народнай Рэспублікі.

Дыпломам І ступені быў уганараваны Зміцер Астроўскі, дыпломам ІІ ступені — Андрэй Кулеш, дыпломам ІІІ ступені — Яўген Аснарэўскі. Заахвочвальныя дыпломы журы прызначыла Марыі Шэбанец і Паўлу Бракаву.

exl850.jpg

Зміцер Астроўскі, Павел Бракаў, Андрэй Кулеш — лаўрэаты конкурса "Экслібрыс"

Другім, не менш важным пытаннем паседжання было прыняцце новых сябраў арганізацыі. Пасля прадстаўлення кандыдатаў старшынёй Прыёмнай камісіі СБП Аксанай Спрынчан, сябры Рады таемна прагаласавалі і прынялі ў сябры ГА "Саюз беларускіх пісьменнікаў" Васіля Герасімчыка, Алеся Замкоўскага, Міколу Канановіча і Таццяну Яцук.

Завершылася паседжанне абмеркаваннем дзейнасці абласных філій ГА "Саюз беларускіх пісьменнікаў", пытаннямі парыхтоўкі рэгіянальных літаратурных акльманахаў.


Прэс-служба ГА "Саюз беларускіх пісьменнікаў"