"Дзяржаўны суверэнітэт — непарушны прынцып": МЗС адказала Радзе Саюза беларускіх пісьменнікаў

Сакратарыятам ГА "Саюз беларускіх пісьменнікаў" атрыманы адказ Міністэрства замежных спраў Беларусі за подпісам намесніка міністра замежных спраў Я.А. Шэстакова.

Ведамства Уладзіміра Макея запэўнівае літаратараў, што "праца над адноўленай Праграмай дзеянняў Рэспублікі Беларусь і Расійскай Федэрацыі па рэалізацыі палажэнняў Дагавора аб стварэнні Саюзнай дзяржавы і "дарожнымі картамі"" вядзецца "перш за ўсё, для забеспячэння роўных умоў суб'ектам гаспадарання дзвюх краін". Акрамя таго, сцвярджаецца, што адносіны з Расіяй "будуюцца з улікам нацыянальных інтарэсаў Рэспублікі Беларусь".  

"Дзяржаўны суверэнітэт — непарушны прынцып у рэалізацыі знешнепалітычнага курсу Рэспублікі Беларусь у адносінах з усімі без выключэння дзяржавамі, у тым ліку ў рамках міждзяржаўных аб'яднанняў", — падкрэслівае Міністэрства замежных спраў.


Нагадваем, што 24 снежня Рада ГА "Саюз беларускіх пісьменнікаў" прыняла заяву, у якой звярнулася да беларускіх уладаў "з заклікам адкрыта і афіцыйна заявіць пра сваю вернасць Канстытуцыі Рэспублікі Беларусь і прынцыпам суверэнітэту, каб раз і назаўсёды зняць усе размовы пра магчымае ўваходжанне Беларусі ў склад Расіі, пра адмову ад падпісання прапанаваных Расіяй так званых “дарожных картаў” аб адзіным эмісійным цэнтры і стварэнні наднацыянальных органаў ды іншых прыдуманых пуцінскай адміністрацыяй прыхаваных спосабаў аншлюсу Беларусі. Мы патрабуем, каб усе дакументы дзяржаўнай важнасці абмяркоўваліся адкрыта і з удзелам грамадскасці".



Прэс-служба ГА "Саюз беларускіх пісьменнікаў"