Кніганошы ХХІ стагоддзя

Вандроўная Кнігарня — праект, ініцыяваны Літаратурным домам Логвінаў з мэтай пашырэння сучаснай беларускай літаратуры і іншаземнай літаратуры на беларускай мове ў малых гарадах, мястэчках і вёсках.

Як?

Цэлы год аўтамабіль, наладаваны кнігамі, будзе наведваць абласныя і раённыя цэнтры, пасёлкі і вёскі, у якіх адсутнічаюць бібліятэкі, адчуваецца нястача найноўшых выданняў, а таксама не сфармаваная інфраструктура для людзей з інваліднасцю.

Што?

У праграме праекту публічныя дыскусіі з сучаснымі літаратарамі, творчыя сустрэчы з партнёрамі з мастацкіх, тэатральных, медыйных і іншых крэатыўных галін, аўтарскія чытанні і воркшопы па крэатыўным пісьме, а таксама праграмы для дзяцей і музычныя выступы.

Калі?

Верасень 2019 – Верасень 2020

Дзе?

Сачыце за праграмай на сайце Кнігарні Логвінаў, а таксама ў сацыяльных сетках.

Навошта?

Праект Вандроўная Кнігарня натхнёны амерыканскай традыцыяй перасоўных бібліятэк, якія сталі сёння неад’емнай часткай сусветнай кніжнай культуры. Як і нашы заходнія калегі, мы мяркуем, што літаратура і чытанне з’яўляюцца не толькі арганічным складнікам асабістага вопыту кожнага, але і абавязковым элементам грамадскага жыцця краіны. Менавіта калектыўнае вымярэнне дазваляе раскрыць патэнцыял літаратуры як генератара меркаванняў, агучванне і абмеркаванне якіх выклікае рэзананс. Гарантам поспеху гэтага працэсу з’яўляецца ідэйны пасярэднік — публічная прастора, якая фармуе цікавасць да перфарматыўных аспектаў чытання, спрыяе дыялогу паміж рознымі гульцамі культурнага поля і развівае звычку крытычнага стаўлення да рэчаіснасці.

У апошнія гады ў Беларусі актыўна асвойваюцца механізмы і інструменты стварэння падобных прастор. Аднак такі фармат арганізуецца пераважна ў сталіцы і не мяркуе стымуляцыю цікавасці да чытання. Такім чынам, літаратура выпадае са слоўніка штодзённасці, а жыхары рэгіёнаў застаюцца выключанымі з публічных дыскусій. Менавіта гэты прабел імкнецца запоўніць праект Вандроўная Кнігарня.

Наша мэта ў тым, каб забяспечыць усіх ахвочых месцам, дзе ў нефармальнай атмасферы можна абмеркаваць прачытанае і напісанае.

Вандроўная Кнігарня — гэта перасоўная публічная прастора, здольная аб’яднаць вакол сябе творчыя і інтэлектуальныя сілы. Арэна для дэбатаў, абмеркаванняў і крэатыўных практык, Вандроўная Кнігарня — гэта незалежны і аднаўляльны рэсурс для пошуку рашэнняў актуальных праблем сучаснасці.