Прэмія Гедройца: на Youtube з'явіліся ўсе буктрэйлеры на шортліст

Цяпер у свабодным доступе знаходзяцца ўсе шэсць буктрэйлераў на фіналістаў Прэміі Гедройца. 

Андрэй Адамовіч «Песня пра Цімура» (выдавецтва «Янушкевіч»)

«Песня пра Цімура» – псіхадэлічная паэма ў прозе і адначасова дынамічны шпіёнскі трылер, які пачынаецца з таго, што ў Варшаву выпраўляецца агент беларускага КДБ капітан Капейкін. Радзіма паставіла перад ім цяжкую задачу – адшукаць загадкавага паэта-камуніста Цімура Хоміча. Для гэтага Паўлу Капейкіну трэба ўцерціся ў давер да багемных сяброў выклятага паэта – беларускіх мастакоў, рэжысёраў і кампазітараў. На фоне прыгодаў капітана аўтар шчодра высмейвае так званую беларускую інтэлігенцыю па асобах і беларускі народ агульна. Аляксандр Саладуха, Андрэй Горват, Сяргей Календа, Андрэй Куціла, Віталь Рыжкоў – і іншыя «дзеячы культуры» з’яўляюцца героямі паэмы. Твор будзе цікавы найперш тым, хто стаміўся ад нудных тэкстаў па-беларуску і любіць захапляльныя гісторыі.




Вольга Гапеева, «Кэмэл-Трэвэл» (выдавецтва «Галіяфы»)

Наватарскі раман Вольгі Гапеевай «Кэмэл-Трэвэл» апісвае сусвет, дзе суіснавалі некалькі рэчаіснасцяў, гімнаў, сталіцаў, ідэнтычнасцяў. На гэтым фоне разгортваюцца першыя жыццёвыя прыгоды галоўнай гераіні, якая далёкая ад ідэалізацыі былых часоў, ад настальгіі. Гэты раман — гісторыя чалавечай крохкасці і даверу ў эпоху жуды і дэфіцыту не толькі прадуктаў, але і пачуццяў.




Адам Глобус, «Рысы» (выдавецтва «Логвінаў»)

У новай кнізе Адама Глобуса сабраны партрэты выдатных майстроў літаратуры і мастацтва. Іх усіх добра ведае аўтар, таму чытач убачыць шмат асабістага і кранальнага, таго, пра што не змогуць напісаць іншыя. На першы погляд, суб’ектывізм Глобуса можа падавацца занадта катэгарычным, але яго кампенсуе шчырасць і праўдзівая любоў да апісаных творцаў.




Сяргей Дубавец, «Тантамарэскі» (выдавецтва «Радыё Свабода»)

Пісьменьнік ходзіць у суд штодня на працягу года і назірае за масавым працэсам мытнікаў, паводзінамі абвінавачаных, судзьдзі, адвакатаў і пракурораў, сяброў і родных, і эстэтыка працэсу зьліваецца з этыкай.  Гэтую кнігу можна парчытаць  як гісторыю сучаснай Беларусі, можна як даведнік у судаводзтве, а таксама як дэтэктыўны раман з многімі літаратурнымі алюзіямі. Маштабны «Кветкавы працэс» разглядаецца ўсебакова і ў драбніцах, нібы пад мікраскопам. Высновы прыводзяць аўтара да філязофскіх адкрыцьцяў.




Зараслава Камінская, «Калядны стол» (выдавецтва «Галіяфы»)

Калі гэта не кулінарная кніга, дык якая?
Гэта кніга пра вас і пра тое, што вы ўзгадаеце, пакуль будзеце яе чытаць. Любімыя стравы, забытыя месцы і людзі, з якімі вы дзялілі ежу і сваё жыццё.

Што вы любілі есці, калі былі маленькімі? Хто для вас гатаваў калісьці і для каго вы гатуеце зараз? Што вы елі апошнім разам, калі адчувалі сябе шчаслівымі?

Калі вы не можаце ўзгадаць ніводнай гісторыі, пачніце чытаць, і ўспаміны з'явяцца над гэтымі старонкамі, нібыта пара над гарачым рондалем.


Ганна Севярынец, «Гасцініца “Бельгія”» (выдавецтва «Рэгістр»)

Каханне, Горад і Час — галоўныя героі гістарычнага рамана «Гас­цініца “Бельгія”», прысвечанага адной з самых прыгожых, амбітных, яскравых і трагічных старонак з жыцця беларускай літаратуры.



Прэс-служба ГА "Саюз беларускіх пісьменнікаў"