Выйшаў новы раман Наталкі Бабінай

Новы раман Наталкі Бабінай – фантастычны трылер з элементамі гістарычнага, палітычнага і жаночага рамана. Раман напісаны на ўкраінскай мове з уласцівым гэтай аўтарцы размахам.

Галоўная гераіня, пісьменніца Алка Бабылёва, жыве недалёка ад Брэста і валодае містычнай здольнасцю "правальвацца ў норы ў часе", гэта значыць трапляць пры пэўных умовах у іншы час. Гэтая здольнасць дапамагла ёй знайсці скарб, праз які яна набыла Будку -- дом каля чыгункі. З таго часу вакол нядаўна набытай сядзібы пачынаюцца загадкавыя і жахлівыя падзеі. Паралельна Алка піша новы раман, які лічыць галоўным тэкстам свайго жыцця – пра жыццё Берасцейшчыны з ХVII стагоддзя да Другой сусветнай вайны, у прыватнасці, дзейнасць УПА на гэтых землях. Паступова дзеянні «рамана ў рамане» пераплятаюцца з галоўным сюжэтам. Містычная здольнасць Алкі зноў прыходзіць на дапамогу, калі грозныя невядомыя сілы пачынаюць перамагаць... Ці змогуць героі рамана (а гэта не толькі людзі з Беларусі і Украіны, у прыватнасці прэзідэнты гэтых краін, але і сяброўка-Смерць, і кот, які ў выніку эвалюцыі навучыўся гаварыць) супрацьстаяць бязлітасным антыгомам, каб прадухіліць глабальную катастрофу, якая пагражае знішчыць чалавецтва? Як можна выратавацца?

У кнізе дзейнічаюць некаторыя героі першага рамана Бабінай “Рыбін горад”, аднак “Бодай, будка” – зусім самастойны твор.

Набыць кнігу можна ў крамах "Акадэмкніга" і ў Рамана Цымберава (крама №60 у гандлёвым цэнтры “Купалаўскі”) у Мінску, а таксама замовіць па пошце на сайце kniger.by.



Паводле прэс-рэлізу