Цімафеева Юлія Пятроўна

Юлія Цімафеева (Yulya Tsimafiejeva, Julia Tsimafejeva), паэтка, перакладчыца.

Нар. 12.01.1982 г.  у в. Спярыжжа Брагінскага р-на Гомельскай вобл. Скончыла факультэт ангельскай мовы МДЛУ, Беларускі Калегіюм, наведвала Перакладніцкую майстэрню.  Адна з заснавальніц і рэдактарак інтэрнэт-часопіса перакладной літаратуры "ПрайдзіСвет". Каардынатарка Школы маладога пісьменніка пры ГА "Саюз беларускіх пісьменнікаў". Жыве ў Мінску.

У 2012 годзе дэбютавала ў міжнародным жаночым слэме (Мінск) і ўвайшла ў тройку пераможцаў, саступіўшы толькі Сольі Крапу (Швецыя) і Веры Бурлак (Беларусь). Пераможца ў прозе конкурса для маладых пісьменнікаў "Экслібрыс", арганізаванага ГА "СБП" у 2012 г.

Аўтарка паэтычнага зборніка "Кніга памылак" (2014), які ўвайшоў у шортліст прэміі "Дэбют" імя Максіма Багдановіча ў намінацыі паэзія.

Бібліяграфія

Перакладала паэзію з ангельскай мовы – Ч. Букоўскі, М. Дзікмана, С. Крэйна, Э. Лоўэл, Ў. Ўітмана, з партугальскай – А. Каэйру, з гішпанскай – М. Эбну; прозу з ангельскай – Э. Ч. Асонду, М. Бірбам, Г. Ч. Босман, Ш. П. Гілман, Д.Г. Лоўрэнс, Дж. К. Оўтс, К. Шапэн і інш. 

Пераклады прозы і паэзіі розных аўтараў з’яўляліся ў часопісах “pARTizan”, “Паміж”, “ARCHE”, “Дзеяслоў”, газеце “Літаратурная Беларусь”. У 2011 годзе ў сумеснай серыі Саюза беларускіх пісьменнікаў і часопіса “ПрайдзіСвет” выйшаў том выбраных твораў Эдгара По, дзе ў ліку іншых былі надрукаваны пераклады апавяданняў “Залаты жук” і “Калодзеж і ківач” .