Роўда (Салаўёва) Марыя Аляксееўна

Навукоўка, перакладчыца, празаік.

Марыя Роўда (сапр. Салаўёва Марыя Аляксееўна) нарадзілася 26.07.1975 года ў г. Менску. Каранямі з Мядзельшчыны і Магілёўшчыны. Вучылася ў розных сярэдніх школах г. Менска. У 1992 годзе скончыла аддзяленне беларускай мовы і літаратуры Ліцэя БДУ.

Вышэйшую адукацыю атрымала ў Менскім дзяржаўным лінгвістычным універсітэце па спецыяльнасці «выкладчык ангельскай і нямецкай моваў» (1992–1997 гг.). У 1996 годзе на працягу аднаго семестра стажыравалася ва Універсітэце даліны Тэмзы, Лондан.

У 2005 годзе абараніла ў МДЛУ кандыдацкую дысертацыю па германістыцы ў галіне дыскурсійна-кагнітыўнага аналізу тэксту на тэму «Роля дыстантных адносінаў у структураванні і разуменні ангельскага мастацкага тэксту».

Працуе ў МДЛУ на катэдры гісторыі і граматыкі ангельскай мовы з 1997 года.

Упершыню надрукавалася ў 1993 годзе ў “Нашай Ніве” (апавяданне «Вырві гэта зь мяне»). Ад гэтага часу друкавалася ў “Нашай Ніве” і “АRCHE Пачатак”. Выдавалася ў зборніках “Жанчыны выходзяць з-пад кантролю” (Менск: Логвінаў, 2007) і “Antologie Běloruských Povídek” (Brno: Větrné Mlýny, 2006).

У 2015 годзе выйшла з друку кніга аповесцяў і апавяданняў «Клінічны выпадак, альбо Дарэмныя ўцёкі» (Менск: Кнігазбор).

Перакладала на беларускую мову англамоўную прозу, драматургію, дзіцячыя фільмы і мультфільмы.

Сябра Саюза беларускіх пісьменнікаў з 2016 года.